BARRY Rukoro, ta monika a fa kee na ko nasha, okwa ti ke wete e li pokuthiga po iilonga yuuhamushangandjayi wongongahangano yokatanga kokoompadhi moNamibia, Namibian Football Association (NFA), nando mombelewa okwa fundilwe mo kaapolosi uunambo.
Oshinima shotango sha longwa kokakomitiye kowina, hoka ki inekelelwa okweeta kondjila NFA, osho okutidha miilonga amushangandjayi, ngoka a kala a kanyatela koshipundi omimvo tadhi ihilile pomilongombali.
Konima sho omupresidente gwoNFA, omusamane Frans Mbidi, a ndopa oku mu funda poshipundi shuuhamushangandjayi iikando iyali, Rukoro okwa lombwele onzonkundana ndjika kutya elombwelo lyoku mu kutha miilonga ndyoka a pewa komunashipundi gwokakomitiye kowina Hilda Basson-Namundjembo, inali yela, nokwa dhiladhila a ka konge uuyelele.
Oshipundi kashi na mwene sigo otaku ka gandjwa etseyitho.
“Pantumwafo ndjoka nda mono, Fifa okwa ti okukala kwandje kwembwengelela moNFA kaku li pampango. Inashi yela ngele okukala kwandje mehala lyoNFA oko kaku li paveta nenge uuhamushangandjayi wandje owo waa li paveta,” Rukoro ta ti ngaaka.
“Otandi shi endulula natango, ngame onda kutwa miilonga koNFA. Inandi kutwa nando koFifa. Inandi kutwa wo kuMbidi nenge kaanambelewa (ye). Ano aawiliki yoNFA oyo ashike taa vulu okutidha ndje, ihe ke shi Fifa,” Rukoro ta ti.
“Otamu vulu okutya onda kuthwa miilonga. [Ihe] Ngame inandi za miilonga.”
“Oya tumina ndje okumbi yu udha aapolosi ya kuthe ndje mo mombelewa yandje,” Rukoro ta gwedha po, ta popi kombinga yokakomitiye kowina hoka ke mu tumine aapolosi opo ye undule mo mombelewa.
Sho a pulwa kombinga yokontalaka ye, ndjoka ya holola kutya iilonga ye ota kala nayo sigo ota thiki komimvo dhopenzela, Rukoro okwa ti: “Shoka otashi ka talika nale, kashi shi nena. Otashi ka kala shili oshihokithi okutala.”
Basson-Namundjembo okwa tseyithile Rukoro kutya omayakulo ge inaga pumbiwa mo we moNFA, sha landula sho okakomitiye ke ka kuutumbile oshikando shotango mEtiyali.
Okakomitiye haka, kiilyo itano, oka totelwe mEtitano lya zi ko, noko taka kala taka kwatele komeho NFA sigo pwa hogololwa ewilikongundu epe.
Metseyitho ndyoka a gandja kiikundaneki, Basson-Namundjembo okwa ti Rukoro ina yalulwa we koFifa ongaamushangandjayi gwoNFA, onkene okakomitiye oka pula Rukoro a gandje iinakugwanithwa nomaliko agehe goNFA, ngaashi ohauto yoToyota Fortuner, kuMrs Meriam Tjivikua, omukuluntuwiliki gwoshikondo shiimaliwa moNFA. Basson-Namundjembo okwi indile wo ayehe mboka ye na mo olunyala muudhano wokatanga kokoompadhi moshilongo ya taambe ko elombwelo ndika yo ye li dhiginine, ko kwaa yiwe nando omoondjuvanene dhasha naRukoro kombinga yoNFA.
Kakele kaBasson-Namundjembo, mokakomitiye, hoka ka pewa iilonga koFifa, omu na wo Franco Cosmos, Gaby Ahrens, Matti Mwandingi naVivienne Katjiongua ongiilyo.
Nando oshipundi shaRukoro oshinene nosha simana okutala kiilonga yokakomitiye, oshinakugwanithwa oshinene shokakomitiye haka osho okukwatela komeho omahogololo gewilikongundu lyoNFA.
Mokati kiilyo ayihe yokakomitiye haka kamu na nando oshimwe tashi ka thigathana po momahogololo goNFA.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
