RDP ta nyenyetele NBC moshinima shehiyo lyiigongi

ONGUNDU yo RDP, otayi nyenyetele NBC sho a tokola kutya mOradio ye itamu hiywa we iigongi yoopolotika ashike ota etha natango Swapo a hiye iigongi ye yOpolotika okupitila mOradio yo NBC pamukalo gwekotokelo kutya aniwa otaya hiyi iigongi yopapangelo yoshigwana ashihe nonando iigongi yatya ngawo oyopapolotika yoyeneyene, ano yoSwapo.

Pethimbo ta popitha oshigongi sho RDP pOnheleiwa, gumwe gwomaakuluntu ya RDP Martin Heita, ta ti NBC nOswapo ya tameka okukengelela moshinima shehiyo lyiigongi yOpolotika. Heita ta ti, Ookaansela yoSwapo na NBC, oya uvathana ya kotokele moshinima shika. Heita te shi yelitha ta ti, okuza ngaa sho NBC a ti kutya inaku hiywa we iigongi yOpolotika tashi pitile moNBC, NBC nOokaansela yoSwapo unene tuu yokOnooli, oya tsa kumwe kutya yo inaya tya we iigongi yOswapo (yOpolotika), ihe naya tye ashike iigongi yOpapangelo, yoshigwana ashihe, nonando paushili oyOpapolotika yOswapo. ‘Uuyuki nokwaagamambinga kwa NBC oku li peni mpoka, ngele okwa tsa kumwe nokukoleka uukengeleli watya ngawo. Omahogololo otaga ka kala tuu ga manguluka, ge li pauyuki nogopaudemokoli, ngele nani NBC okwa tameka nale okugama ombinga nonando aakalimo ayehe yoongundu dhi ili nodhi ili ohaya fendele Oolisenisa dhoNBC pwaa na kutya mbaka oyOswapo nenge oyOngundu yini,? Heita ta pula nokutya ngawo, ye ta indile NBC a ethe po meendelelo egamombinga moshinima shehiyo lyiigongi nokuyakule ayehe shi thike pamwe.