RDP a popi kombinga ye tilitho lya Kaaronda

ONGUNDU yo RDP oya ti omapopyo kutya otapa ningilwa amushanga Ndjayi gwondundahangano yaaniilonga yaNamibia omatilitho geso ota shi ulike onkalo yopolitika ya fa ndjoka yuukoloni.

Amushanga guuyelele mongundu ndjoka, Jeremia Nambinga okwa ti ongundu ye ota yi pangula omatilitho ngoka aniwa ga ningilwa Evilastus Kaaronda, kOminista Yevi nOmatulululo, Alpheus !Naruseb. Okwa ti Kaaronda ngaashi ashike omukwashigwana kehe oku na uuthemba oku popya shoka uuvite kombinga yoshinima kehe sha guma Namibia. Nambinga okwa ti etilitho lyeso na li papudhule aakwashigwana opo ya tale kutya oshilongo oshuuka mondjila yinipo. Nambinga okwa ti oshinima shika otashi ulike kutya epangelo lya Namibia oli na elalakano oku kalekapo uulingilingi moku katukila onkatu yaana ohenda mboka ta ya yelutha omawi gawo oku popya ngele oye wete uulingilingi tawu longwa moshilongo. Nambinga okwa pangula woo epangelo sho aniwa ngashingeyi itaali gwanithapo euvaneko lyalyo oku kondjitha iilonga yuulingilingi, ndele ngashingeyi oha li ka holama konima yoKommissi yokukondjitha Uulingilingi uuna lya taalelwa koshinima shuulingilingi. Nambinga okwa popi a ti ngaashi pethimbo lyuukoloni, aantu aniwa ota ya si tashi kumitha nokweeta omaipulo, onkene ongundu ye oyi na uutile kombinga yetilitho lyeso aniwa lya ningilwa Kaaronda ku !Naruseb. Nambinga okwa tsu omuthindo poshinima shika noku ninga omapulo kombinga yomaso inaaga vula oku fatululwa gaantu ngaashi, Bernard Nakale, Lazarus Kandara, na Lazarus Ipangelwa. Mbaka oya si kohi yonkalo ta yi eta omaipulo, molwaashoka epangelo aniwa ina li gandja efatululo ewanawa kutya mbaka oya si koshike naanaa.Okwa ti ongundu ye ita yi kiidhidhimikila oku tala aakwashigwana ta ya mbandamekwa komukalo nguka.Nambinga okwa indile kOmuperesidende Hifikepunye Pohamba opo a ete puuyelele omushangwahokololo gu na sha nekano lyiimaliwa yopenzela yaaniilonga yepangelo, GIPF. Nambinga okwa ti epangelo noshowo Omuperesidende Pohamba oye na oshinakugwanithwa oku tseyithila oshigwana kombinga yekonakono ndika. Ngele epangelo ina li longa sha kombinga yaashika , oshinima shika otashi ka kugila holomende ethimbo alihe.