Pohamba Shifeta a indila aagundjuka yaa nwe we iikolitha

PETHIMBO ta popitha aalongisikola noshowo aanasikola naavali yamwe pOsikola yAanona ya Ongenga mOshitopolwa shaHangwena mOmaandaha ga zi ko, Omupeviminista gwAanyasha, Omaudhano nOmithigululwakalo omusamane, Pohamba Shifeta okwa indile aanasikola pOngenga noshowo poosikola dhilwe moNamibia noshowo nee kaanyasha ayehe koonono moNamibia, yi idhilike iikolitha nokulongitha iingangamithi, yo ya kale taya vulika kaakuluntu yawo no yi itule meilongo lyawo nokuhumitha komeho oshilongo.

Esiku ndika Osikola ya Ngenga, ndjoka OmupeviMinista Pohamba Shifeta e li Kahewa kayo, oya pelwe omagano gokOmpiuta nOprinda kEhangano Ekwashilipaleki lya Metropolitan.Konima sho a pandula Omukuluntu gwaMetropolitan moNooli tate Elifas Oupapa Shipanga ngoka a li a eta omagano ngaka, Shifeta okwa ti elongo moNamibia otali yonwa komidhingoloko kadhi li nawa nokaanasikola inaya hala okuvulika, notaya uhala ashike taya nu omalovu niingangamithi, ngashi omapangwe, oopela dhiingangamithi, ndele taya yonuuka momitse noondunge dhawo tadhi zi pomahala nokukanitha ombepo yeilongo. Yo mboka yaakadhona taya yi nokuli komahala gOombwanda, ngashi hashi popiwa, taku yiwa kOshikango hoka nokulanditha po omalutu gawo. Aamati taya nu iikolitha, iingangamithi nokukwata aakadhona naanona ashona koonkondo Yamwe tayi imangeleke omolu omaupyakadhi taga etwa kiikolitha nelongitho lyiingangamithi. Taya umana nokudhenga aalongisikola. Komagumbo itaya vulika noye li taya dhipagele aakulupe iimaliwa yawo yOpenzela, taya ningi oombotostos nokupiyaganeka pomikunda dhawo mpoka. ‘Yakwetu aanyasha naakuluntu inatu nweni we, otatu iteya po tse yene noshilongo shetu. Itatu ka kala we tatu dhilaadhila nawa nehumokomeho lyoshilongo shetu otali ka kala li li moshiponga oshinene. Yamwe otaya ti otwa manguluka opo tu ninge shoka twa hala. Tatu iningeni oshege tseyene, ngele otatu etha tu pikwe kiikolitha. Ngele tashi ya kElongo lyoshigwana shokomongula, oshi na okukala oshinakugwanithwa sha kehe gumwe, kashi shi ashike shEpangelo. Ndishi opu na mboka ye hole kutya ‘Epangelo nali tale po nawa mpoka, naampaka nani oshinakugwanithwa sha li shi na okukala she mwene? Elongo kali shi ashike lyEpangelo nenge lyaalongisikola, olyaantu ayehe na kehe gumwe na kale a kutha ombinga mewapaleko lyElongo, kutya nee omegumbo, opomukunda omOshikandjohogololo sheni nenge mOshitopolwa sheni, kehe gumwe na yambidhidhe Elongo li kale lya opala noli li momudhingoloko gwoopala nogu li nawa,’Shifeta ta ti ngawo nokwiindila kaakuluntu moshigwana noshowo kooyene yomikunda, kOpilisi, kOokaansela kAasitagongalo nokaawiliki yalwe moshigwana momikunda miitopolwa yawo moka ya tale kutya oondingosho nOobaa dhomalovu otadhi kondololwa nawa. Ku uthwe nande oowili ndhoka oondingosho nOobaa dhi na okupatulula naandhoka dhi na okupata. Shifeta ta ti ngashi koBotswana, kaku patuluka ondingosho nenge Obaa mOosoondaha. Omusamane Shifeta ta ti aavali naakuluntu nayo, ina ya gandja oshiholelwa oshiwinayi komaluvalo gawo pakukala koondingosho ethimbo alihe nenge okunwa nayi sigo omuntu to dhimbwa mpoka wu li, oshoka oshi li wo oshiholelwa oshiwinayi kaanona.Minista gwOpevi Shifeta ta indile wo kaavali nokaakuluntu ya kale ya simaneka onkalonawa yaanona yawo. Oku ya tekula nawa noku ya kelela kiinima mbyoka tayi yono po eilongo lyawo. Ta ti uunona inawu tumwa we omalovu koondingosho. Uunona mboka wu li ponkatu yokuhita osikola, inau kala we tau lithithwa iimuna pethimbo lyosikola. Ina ku ningwa we omalufo omoluusita wiimuna. Ta ti Oveta ya Namibia otayi ti kutya okanona kehe koomvula ndhoka dhopevi ke na okuya kOsikola esiku kehe. Shifeta ta indile wo kaavali nokaakuluntu ya kale taya longo omapya opo yi imonene iikulya, unene tuu yaanona yawo, na inayi inekela ashike mIikukuta mbyoka taya topolelwa kOokaansela. ‘Kehe gumwe na lime epya lye. Pethimbo lyoondima, oondingosho nadhi kale tadhi pata, aantu ya kalonge momapya gawo, yi imonene iipalutha,’Shifeta ta ti ngawo nokugwedha po ta ti kutya okwa tseya Osikola yimwe hayi longo nawa nokupititha nawa moNamibia muka molwashoka omudhingoloko moka yi li omu li nawa naanona unene kaya longitha iikolitha, onkee ohaya piti nawa nonando pOsikola yawo mpoka kapu na iikwaniipangitho ya gwana. ‘Aanona naya kale ya uvithwa ko nawa kutya Elongo oshike na olya simana ngiini monkalamwenyo yawo. Ashike nee nandi shi popye wo sha yela mo nawa kutya, shika otashi vulika ashike okuningwa ngele aavali naakuluntu yaanona, oyo ye li uvite ko nawa tango,

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.