Pohamba okuli mefudho

OMUPRIMA Minista, Nahas Angula okwa ti Omuperesidende Hifikepunye Pohamba oku li mefudho lyokomumvo.

Omundohotola gwopaumwene gwOmuperesidende naye okwa koleke shika kutya omutse gwoshilongo ogu li mefudho lyokomumvo, ndele kagu li mefudho lyuuwehame ngaashi sha kala tashi fofotolwa. Omuprima noshowo Ominista yIipambele yomuperesidende, Albert Kawana oshiwike shapitile oya ekelehile omipopyo kutya Omuperesidende okwa kwatwa kuuvu wedhengo lyomutima kashona. Omahokololo ngaka oga li ga popiwa konima sho Pohamba a li a taambelwa moshipangelo shopokati shepangelo moVenduka, moka a kala omasiku gatatu. Omundohotola gwa Pohamba, Viscaya Amutenya ina gandja uuyelele washa kombinga yuundjolowele womupangwa gwe, kakele kokutya nguka okuli nawa nota vululukwa poShiwakopo. Amutenya okwa kwashilipaleke, omutoolinkundana a ti omuperesidende okuli poShiwakopo, mefudho lye, okwa gwedhako a ti ongo omundohotola gwe oku wete kutya okwa pumbwa okuvululukwapo kashona. Omanga Omuprima Angula okwa ti omuperesidende okwa yile koshipangelo okuka talwa ngaashi heshi ningi omumvo kehe kombinga yuukolele we, nokonima yokukonakonwa hoka okwa kutha efudho lyopokati komumvo ndyoka hakutha omumvo kehe. Okwa kwashilipaleke oshigwana kutya inashi pumbwa okukala nomaipulo, nokwa gwedha ko a ti Pohamba okwa li a ende niilonga olundji omolwa iinakugwanithwa ya gwedhwapo, ngaashi yuunashipundi waSADC.Ndohotola Amutenya okwa ti Omuperesidende Pohamba ota kala mefudho sigo omomasiku gatatu ga Auguste nuumvo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.