OMWAALU gwaantu oyendji ogwa kala tagu zi ko koshitopolwa shErongo nokuya kiitopolwa yilwe ngaashi mbyoka yokonooli yoshilongo, sha landula sho omangambeko gamwe ga li ga yulululwa moshitopolwa shoka shokomukulofuta.
Embomboloko lyaantu mboka olye eta uumbanda molwaashoka otashi vulika li taandelithe ombuto yocoronavirus(covid-19) miitopolwa moka aantu mboka taya yi konooli yoshilongo, molwaashoka oshitopolwa shErongo ngashingeyi osho shi na omwaalu ogundji gwaavu Covid-19.
Ondoolopa yaMbaye ngashingeyi oya ningi oyo ehala ndyoka li na etaandelo lyoCovid-19 li li pombanda moshilongo, nosha li nokuli she etitha etokolo ku kalekwe egandjo lyomikanda dhokuza mo moshitopolwa shoka, opo ashike ku kondjithwe etaandelo lyombuto ndjoka.
Omukuluntu gUundjolowele moshitopolwa shaShana, Johanna Haimene okwa li a lombwele oThe Namibian kutya oshitopolwa shawo osha taalela eshongo enene lyomahala inaaga gwana okwi ikalekelwa omwaalu ogundji gwaantu mboka taya zi kErongo, ishewe kashi na iikwaniipangitho ya gwana okukonaakona oCovid-19 maantu yomwaalu ogundji.
“Otwa taalelwa keshongo enene lyaantu taya zi koshitopolwa shEtongo taye ya konooli. Kehe esiku otatu dhengelwa oongodhi kaantu taya pula mpoka aakwanezimo yawo tayi ikalekelwa mboka ya zi koondoolopa dhi li moshitopolwa shErongo ashike tse katu na omandiki gokwi ikalekelwa, moka tatu vulu okuyatula ayehe.
“Otu na mboka twe ya tula mendiki lyokwi ikalekelwa nonande inashi pitikwa, otatu kambadhala ashike mpoka tatu vulu opo tu kondolole ombuto ndjoka. Katu shi nokuli kutya omolwashike opolisi moshitopolwa shErongo tayi gandja omikanda dhomalweendo kaantu oyendji omanga omwaalu gwaavu yombuto ndjoka tagwi indjipala kehe esiku. Otashi tulitha omutse kepepe naantu oyendji moshitopolwa ngashingeyi oye niwe kuumbanda,” osho Haimene a popi ngaaka.
Sigo oompaka moshitopolwa shaShana omwi ikalekelwa aantu ye li 27 noyendji yomwaamboka aahingi yomaloli goondongelwa osho wo mboka ya li ya zi koondolopa dhi li moshitopolwa shErongo omasiku ga piti.
Haimene okwi indile aakalimo yomoshitopolwa shaShana ya ngungumane molwaashoka oshikondo shuuhaku otashi kala nokutonatela onkalo moshitopolwa.
Sigo oompaka moshitopolwa shoka inamu lopotwa omuntu a kwata koCovid-19.
“Aakwashigwana naya tsikile nokwi iyutha komalombwelo nokomilandu dha tulwa po kepangelo osho wo okwi ikalathana kokule. Ngele owa mono wu na omandhindhiliko ga fa goCovid-19, matukila mbala kokapangelo nenge koshipangelo shi li popepi opo wu konaakonwe ombuto ndjoka.
“Sigo oompaka itatu ningi natango omakonaakono gombuto ndjoka maakwashigwana [momwaalu ogundji], otatu konaakona ashike mboka yi itulilwa nenge aavu mboka ye na omandhindhiliko ga fa goCovid-19. Ombuto ndjoka oya nika oshiponga naantu ayehe naya kale yi isila oshimpwiyu yoyene osho wo okuyanda omangundumano,” osho a popi ngaaka.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
