MAYOLA wodoolopa yaShakati Angelus Iiyambo okwa ti nomoudwaali elelo lodoolopa otali ka twikila nokulonga noudiinini opo li nane ovatuvikilipunguli voshimaliwa nokweeta po eemhito doilonga opo ku nawapalekwe onghalo yopamaxupilo yovakalimo.
Iiyambo edi okwedi popya mEtitatu loshivike eshi konima eshi a hoololululwa a ninge mayola wodoolopa yaShakati oshikando shitivali.
Iiyambo – oo a hoololelwe lwotete onga mayola waShakati pexulilo lodula ya dja ko – okwa hoololululwa pefimbo loshoongalele showina shelelo lodoolopa mEtitatu loshivike eshi.
Oshoongalele osha li mewiliko laMangastrata omukulunhu Mikka Namweya. Omahoolololo oomayola veedoolopa ohaa ningwa alushe pexulilo lodula.
Moshipopiwa shaye shetambulo loshipundi, Iiyambo okwa pandula ookansela vodoolopa yaShakati eshi vemu lineekelela oshilonga nokwa udaneka nokutya ota ka longa noudiinini moinakuwanifwa yaye aishe ngaashi naanaa tashi ufwa koveta yomalelo eedoolopa yomudo 1992.
Okwa ti Muni waShakati okwa hanga omafindano manene odula yoneudo.
Moilonga yomupondo yaMuni waShakati omwa okwatelwa ewapaleko lomapandavanda Kwame Nkrumah naImmanuel Shifidi, okutula mo omikala domatondokelo omeva odula nelongekido leenhele dokutunga omaumbo.
Okwa ti nande onghalo yopamaxupilo kai li nawa moNamibia nomounyuni aushe, elelo lodoolopa yaShakati otali pula komesho nokutula moilonga eepoloyeka edi da fanekwa, ngaashi okutunga ondjila ya dja lwopOkatana Service ya finda komatala mape a lukilwa omunangeshefa Frans Aupa Indongo.
Iiyambo okwa ti ovafaneki vondjila ova pewa nale oshinakuwanifwa, noilonga otai ka tameka momudo 2018.
Elelo otali ka twikila yo okulongekida eenhele 3000 dokutunga omaumbo ombiliha momukunda Ehenye.
Elelo otali ka tula omaloobota pomashakeneno eendjila pOkandjengedi, pEhenye nomondjila ya finda kOkahao.
Iiyambo okwa ti ponhele yomutulilwa weetaksi da finda kOutapi ota pa ka tulwa elandulafano, yo onhele yomalihafifo oyo i nokangwena nomiti domidile i li komesho yeembelewa doshikondo shoimaliwa mepandavanda laAgostinho Neto, otai ka lepekwa i ye fiyo okOkatana Sevice.
Iiyambo okwa shiivifa yo nokutya elelo otali ka pitifa oveta i nasha nomalinyengo eebesa neetaksi modoolopa.
Ovashiiviveta ove lipyakidila nokuli nale okushanga oveta oyo kwa teelelwa tai ka diminwa nokutulwa moilonga omudo 2018.
Kakele kaIiyambo a shuna moshipundi shoumayola wodoolopa, Ndamononghenda Hamunjela naye okwa hoololululwa onga mayola wopedu, ye Gabriel Kamwanka ta shuna koshipundi onga omunashipundi wokomitiye omhitifi yelelo lodoolopa.
Mokomitiye ove li mo naLoise Shivolo naJohannes Shilongo.
Ookansela Katrina Shimbulu naLinus Tobias otava twikile onga oilyo yelelo lodoolopa vehe na oshinakuwanifwa sha wedwa po. Eedoolopa dikwao moNooli nado oda ninga omahoololo.
Kansela Eliaser Nghipangelwa okwa hoololululwa onga mayola wodoolopa yokeengaba daNamibia naAngola. Panduleni Hainghumbi ota twikile onga mayola wopedu omanga Lylie Hashoongo a shuna moshilonga shounashipundi wokomitiye omhitifi. Oilyo ikwao yokomitiye oyo Paulus Haikali naThomas Kandjebo.
Paavo Amwele okwa shuna poshipundi onga mayola wodoolopa. Saima Namukwambi oye mayola wopedu, omanga Andreas Kalumbu a hoololululwa onga omunashipundi wokomitiye omhitifi omo ve li mo naAbed Paulus Matsi naAnna-Helena Itope.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
