‘Otwa hala omumwetu’

AAVALI yohanana yoomwedhi 13 ndjoka ya kuthilwe kaahungimwenyo sho yi iteyele megumbo mok haa zi oshiwike sha zi ko moWindhoek, oya hala ya shunithwa kuyo.

Opolisi oyi iteyelele megumbo ekulu lyepangelo li li mepandaanda Robert Mugabe, konima sho onzonkundana ndjika ya olopota kutya egumbo ndyoka (lya kulupa nayi nolya nyayika) olya ninga olukalwa lwaamboka yaa na omagumbo.

Megumbo moka ohamu zi aantu ye vule 18, nohamu iteyele oyendji ngele omilema dhe ya.

Mokati kaakalimo yomegumbo ndyoka omwa kwatelwa Immanuel Klein nomuholike gwe Sentia Xoagus, mboka ya kuthilwe okanona kopolisi.

Omuvali omukwawo, Janine van Wyk, naye ha zi megumbo moka, okwa fadhukile po nokamwanamati komimvo mbali sho opolisi naahungimwenyo yi iteyele ‘megumbo lyawo’.

Iipala yaavali mbaka yaali oya li ya nika oluhodhi pethimbo onzonkundana ndjika ye ya talele po uunambo.

Xoagus okwa ti aapolisi naahungimwenyo oya yakula po omwana ya fa taa kwata ombwa.

“Onda matuka nda landula ohauto yawo. Onda hala ashike okuuva ngele okamwandje oke li moshipangelo. Omolwashike itandi pewa ompito yokulala ponto yako,” Xoagus ta popi ye ta hekumuna.

Okwa hokolola wo kutya olundji ohaa faula okunwa omiti dhawo, molwashoka ihaa kala ye na iikulya.

“Paife ohandi lala tandi pi komutima. Otandi hupu ngiini ndaa na okamwandje?

Mehala muka ondi li mo netompelo, shaashi kapu na we mpoka tandi yi,” Xoagus ta ti, ta gwedha po kutya okwa kala ta kondjitha epangelo li ya pe olukalwa ihe kemanya ku za wo ontsi.

“Ngele onda mono kutya omumwandje oku li megumbo li li nawa, nena oko tandi mu thigi, ihe ngele onda mono kutya ka li li nawa, otandi mu fala kumumwameme,” Xoagus ta tsikile.

Klein okwa ti sho aahungimwenyo ye ya, oye yi indile tango ya tale ngele otaa monene okamwanamati mpoka taka vulu okukala.

Konima, Klein ta hokolola, aahungimwenyo oya galuka yu umbwa komeho komiya dhashinana e taa yi nomwanamati.

Omupopiliko gwoshikondo shethikithopamwe lyoomeme nootate nonkalonawa yoohembundangele, Walters Kamanya, okwa ti aahungimwenyo oya fatululila Xoagus kutya omolwashike taa yi nomwana.

Kamanya ina popya mpoka pu ikithwa ohanana, ashike okwa ti oke li ‘meke liwa’.

Xoagus ota talele po ashike omwana uuna pu na elongelokumwe. Kamanya okwa ti oshikondo she osha pewa oshinakugwanithwa shokusila oshimpwiyu aanona mboka ye li mompumbwe.

“Otwa kala tatu mu kongo okuza omvula ya zi ko, ihe ngashingeyi otwe mu mona,” Kamanya ta ti.

Pahokololo lyaKamanya oomeme yamwe ohaa ka talela po oyana momahala moka taa silwa oshimpwiyu e taa ya yaka mo.

Yamwe ohaa longitha oyana uuna taa hehela momapandaanda, Kamanya ta gwedha po.

Komanda gwopolisi yamuni, Abraham Kanime, okwa ti ita vulu okukomenda, molwashoka iilyo yetanga lye oya li ashike ya ka kwathela.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.