Otu na ashike omunyekadhi gumwe – Mupiya

Mokavidio taka ingaana komalungula ka ningwa keshenge Wendelinus Hamutenya-Immanuel, oku li mo ta popi kutya oye omunyekadhi gwaNgandjera, molwashoka okwa hokanwa komulumentu gwokOngandjera, Jeremia Immanuel.

Okavidio hoka kamwe komuuvidio owundji mboka Wendelinus a tula komalungula ta popi kutya oye omunyekadhi gwaNgandjera, noshinima shoka ngashingeyi osha geyitha Aangandjera, noyendji otaya indile Wendelinus eshi hulithepo.

“Tse otu na ashike omunyekadhi gumwe gomukiintu, nokuli megumbo lyandje . . . Otu na owala omunyekadhi gumwe,” osho Mupiya a popi ngaaka.

Omupopiliko gwelelo lyopamuthigululwakalo gwaNgandjera, Sakeus Shangula, petameko lyoshiwike shika okwa popi kutya elelo lyopamuthigululwakalo kali na nande uupyakadhi naWendelinus ti ithana kutya oye omunyekadhi gwaNgandjera.

“Uuvidio mboka ohatu wu mono kiikundaneki yopankalathano – komalungula, ashike katu na uupyakadhi naashoka ha kala ta popi [kutya oye omunyekadhi gwoshitunda shaNgandjera]. Ngiika dhengela omunyekadhi yemwene oye a tye ko sha paumwene,” osho Shangula a popi ngaaka.

Sho a kwatathanwa naye uunambo, Wendelinus, ngoka poompito dhimwe hati oye meme Maria Omuyapuki, okwa popi kutya okwi ithana omunyekadhi gwaNgandjera, itashi ti nande kutya ota lalakanene okuyuga ko onkatu yomunyekadhi komukwaniilwa Mupiya.

“Sho handi iyula ngaaka, itashi ehameke omuntu gumwe. Uuna wa tameke okukala naalanduli oyendji pankalathano nenge wu shiwike koyendji owu na okukala ngaa wu na okadhina okawanawa, ta ka hokitha. Ano okadhina hoka aantu taya kala taye ku ithana, ngaashi naanaa handii ithana kutya ongame meme Maria Omuyapuki,” osho a popi ngaaka.

Okwa popi kutya ando okwa li a hala ando ohii ithana kutya oye omunyekadhi gwOukwanyama, ashike molwashoka okwa hokanwa kOngandjera oku na okwi ithana kutya oye omunyekadhi gwaNgandjera.

“Ongame eshenge lyotango ndyoka lyi iholola puuyelele,” osho a gwedha po ngaaka.

Okwa popi kutya mboka inaaya nyanyukilwa omashenge naye shi uve ko kutya omashenge ohaga valwa kehe momuhoko tagu adhika muuyuni.

“Oye li ko pomimvo adhihe, nomomihoko adhihe, yamwe oondohotola omanga yamwe aalongisikola – kutya nee otweya taamba ko nenge hasho, onkene ye li aapambele yetu, ookuume ketu naashiinda shetu.

“Okukala eshenge kashi shi oshinima shaEuropa nenge shaatiligane ashike oshinima shopauntu noshoshili. Aantu naya uveko uuthemba womuntu nemanguluko ngaashi sha thamunwa mEkotampango lyaNamibia. Onkene, shoka shi li pokati komagulu gandje hasho hashi ulike kutya ngame omukwashike,” osho a popi ngaaka.

Okwa pandula wo elelo lyopamuthigululwakalo lyaNgandjera sho kaalina uupyakadhi naye ti ithana kutya oye omunyekadhi gwaNgandjera.

Wendelinus, okwa tseyika nawa moshilongo unene tuu okuza sho a sindana po oshishani sheshenge dhingi moNamibia mo2011/12, nongashingeyi oye omukuluntuwiliki gwehangano lyomashenge moNamibia.

Omwedhi gwa zi ko Wendelinus nomusamane gwe oya nyanwa koyendji sha landula okavidio hoka ki ingaana komalungula taka ulike ye li nomusamane gwe taya kundwa nokupewa omagano pamuthigululwakalo, noyendji oye ka nyana taya popi kutya osha puka.

Yamwe oya gandja ombedhi komukulukadhi ngoka e li mo ta ligola, osho wo omusamane ngoka e li mo teya pe omalovu giilya omanga ya kuutumba kiipundi.

Pethmbo ndyoka Wendelinus okwa popi kutya okavidio hoka okakwatwa pethimbo kwa li ya telelepo yinagona gwomusamane gwe Jeremia momukunda Iikuku moshitopolwa shaShana.

Okwa popi kutya yinagona gwomusamane gwe, meme Anna Makili, okwa li a hiya Jeremia opo e mu etele oshitenya she [Wendelinus].

“Meme Makili okwa lombwele omusamane gwandje opo tu mu talele po, opo ya mone ndje opamwe nookuume osho wo aashiinda ye. Okutalela po kwetu omukunda ngoka Iikuku, kaku na nande ngoka kwa hinda nenge kwe ehameka,” osho Wendelinus a popi ngaaka.

“Tse katu na oshimbuluma shontumba twa pogola. Okukala aaholathani yuukwashikekookantu wa faathana, kashi shi oshinima shi li kondje yekotampango. Ngele aaholathani yuukwashikekokaantu wa faathana oya sa ohoni nenge ya kondemwa, otashi ke eta ya hokane aantu mboka inaaya hala,” osho Wendelinus a popi ngaaka.

Okwa popi kutya ye nomusamane gwe Jeremia ohaya kala noku ulwa omalaka molwashoka yo aaholathani yuukwashikekookantu wumwe – omashenge.

Wendelinus nomusamane gwe oya hokanene koSouth Africa mo2020 konima sho ya kala mekwatathano lyopaihole uule woomvula dha konda puntano.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.