‘Otatu yakula ashike mboka taya pumbwa ekwatho lyomeendelelo’

UUMINISTILI wUundjolowele nOmayakulo gOnkalolanawa otawu ningi omakonakono goshiningwanima sheso lya kakadhona gomimvo 8 ngoka a hulithile mokapangelo kaGibeon moshitopolwa shaHardap oshiwike sha zi, sho taku hokololwa kutya aapangi oya tindi oku mu panga.

Aapambele yakakadhona ngoka oya popi kutya aapangi yopokapangelo hoka oye ya lombwele kutya mesiku lyefudho lyopashigwana ohaya panga ashike aavu mboka taya pumbwa epango lyomeendelelo ngaashi mboka ye na iilalo yombinzi tayi tondoka.

Sarah Domrogh okwa falwa koshipangelo momasiku 10 Desemba, esiku lyuuthemba womuntu, nokwa li e niwe koshimela, onkungo osho wo epupyalo.

Suwala gwa yina yaSarah, Debbie Domrogh, okwa popi kutya esiku ndyoka sho ya thiki pokapangelo, oya dhengele ongodhi omupangi ngoka a li miilonga, ashike okwa tindi okuya pa ekwatho.

Okuza mpoka oya shuna kegumbo, ashike ongulohi ashike yesiku ndyoka kakadhona ngoka okwa mana oondjenda.

“Tse otwa adhika owala opo tweya kofaalama yoGrundoring okuza kOmbaye, notwa tseyithilwa kutya Sarah ku uvite nawa. Onkene omusamane gwandje okwa lombwele ndje ndi thindikile kakadhona ngoka kokapangelo opamwe nayina Petrina. Onkene, okanona otwe ka fala mbala,” osho Debbie a popi ngaaka.

Okwa popi kutya oya pewa onomola yongodhi yomupangi ngoka a li miilonga esiku ndyoka.

“Oya lombwele Petrina kutya otaya panga ashike aantu mboka ye na iilalo tayi zi ombinzi ngaashi mboka ya tsuwa nenge ya zi miiponga. Omupangi ngoka okwa popi kutya iteya a pange kakadhona ngoka molwashoka ke na okukala ta longo esiku ndyoka.

“Otwa kala twa tegelela tu li moshihauto nokanona, tatu ipula ngiika pamwe otetiitedhulula ngaa ye eye kutse. Ashike konima yominute otwa yi molwashoka kapu na ngoka e ya kutse,” osho Debbie a popi ngaaka.

Aanegumbo mboka oya shuna kofaalama yoGrundoring, ndjoka yi li omukaakena gwookilometa 40 okuza moGibeon.

Nonande ya shuna ngaaka Sarah onkene a tsikile nonkungo noshimela.

“Aanona okwa li ye ya taya kugu kutya Saraha okwiihata po. Otwe mu kutha po noku mu tula moshihauto. Otwa dhengele omupangi ngoka natango noku mu pula ngele otatu vulu okuya kokapangelo opo e tu yakule molwashoka okanona ka kali nande ku uvite nawa,” osho Debbie a popi ngaaka.

“Omanga tu li mela lyondjila otwa kala tatu kambadhala okupupaleka epupyalo lye. Nokwa li ta nyengwa okufudha. Otwa kala ngaa ne tatu mu pendula tse tatu mu ithana. Lwahugunina okwa fudha muule lwiikando ine, nokwa mwena,” osho a popi ngaaka.

Petrina okwa popi kutya sho ya thiki kokapangelo lwoshikando oshitiyali, omukeeleli gwomaliko okwe ya egulula, naSarah okwa tulwa kokambete.

“Omupangi okweya, ashike okwa kala owala e li mongodhi ta popi naantu ye. Okwa li tatu mu indile opo a kwathe okanona ketu. Lwahugunina okwa yi mokapangelo komiti nokwa tameke okupopya nomuhona gwe kongodhi,” osho Petrina a popi ngaaka.

Okuza mpoka Petrina okwa hokolola kutya okwa tokola a ye a ka konge ekwatho kaapangi yalwe mboka haya zi momalukalwa ge li momudhingoloko gwokapangelo hoka, nokwa adha taya tyapula nokunwa, molwashoka oya li moshituthi shawo shiilonga shugunina.

“Sho nda galuka, suwala shandje okwa dhengele omupangi ngoka ongodhi opo a ze mo mokapangelo komiti, opo e tu lombwele kutya okanona oke li monkalo yi li ngiini.

“Omupangi ngoka okwa tameke e li momalimbililo. Nondu uvu ta lombwele Debbie; “Owa hala ndi ku lombwele shike? Nye, omwe etele ndje ashike omudhimba!’,” osho Petrina a hokolola ngaaka.

Okwa popi kutya ando aapangi oya gandjele ekwatho mbala ando omwana otashi vulika a hupu.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.