Otaku ka tungwa omagumbo kepangelo okupitila moNHE

OKWA kundanekwa epangelo tali longekidha opo li ka kale lya tunga omagumbo ga adha pomayovi omugoyi (9000) okupitila mehangano lyoNational Housing Enterprise (NHE) naashika okwa kundanwa tashi ka kotha oobiliona mbali oshinkwanu heyali (oobiliona N$2,7) muule woomwedhi omulongo nantano twa taalela. Shika otashi ningwa nee kohi yopolohalama yokushunitha pevi ompumbwe yomagumbo.

Ndhika odha li dha popiwa kominista yomalelo gopaitopolwa, omagumbo nayilwe Charles Namoloh poshigongi shoka a li e na naanambelewa yomalelo gopaitopolwa mwa kwatelwa wo oogavena moka e ya kuthile ko kombinga yoprojeka ndjika onene yopashigwana. Okwa ti oprojeka ndjika otayi ka tulwa oshimaliwa shi thike poobiliona N$45 opo ku ka kale kwa tungwa omagumbo ge li 185 000 muule woomwedhi omulongo naheyali twa taalela.

Epangelo okwa kundanekwa tali ka tula mo moprojeka ndjika oobiliona N42,7 sigo omumvo 2014 notali ya li ka tule po oshimaliwa shi thike poobiliona N$2,5 oomvula ndatu kehe sigo kwa thikwa komumvo 2030. Omuwiliki gwoNHE Vincent Hailulu oku ulike sha yela kutya kehe ondoloopa otayi ka mona omagumbo gangapi naashika okwa kundanekwa tashi ka kala sha tamekwa omwedhi owala ngoka twa taalela.

Ovenduka okwa tegelelwa yi ka kale ya mona oomiliona N$385, Rundu oomiliona N$195, Oshakati oomiliona N$240, Keetmanshoop oomiliona N$179, Katima Mulilo oomiliona N$192 omanga ondoloopa yOpuwo oomiliona N$160. Ondoloopa yaMariental oomiliona N$130, Eenhana oomiliona N$178, Omuthiya oomiliona N$195, Gobabis oomiliona N$178 omanga Swakopmund oomiliona N$260.

Sho a li ta gandja uuyelele ngaaka mboka ya li ya pulakena oya pula Hailulu kutya omolwashike Ombaye ya ningwa oyo onene moshitopolwa shoka shErongo nokwaashoka minista Namoloh okwa tokola mpoka kutya Ombaye otayi pingenwa po kOshiwakopo. Minista Namoloh okwa londodha wo aanapolitika ooyakwawo ya longithe oprojeka ndjika mokwi imonena omawi goongundu dhawo dhopapolitika.

Okwa ti iimaliwa otayi longithwa okutunga omagumbo ihe hakulanda iihauto yOmashete.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.