Osikola yopaumwene tayi ka laleka aalongi 12

OSIKOLA yopaumwene yedhina Northcote Private School ndjoka tayi adhika mOniipa, Omaandaha ga zi ko, oya gandja etseyitho kaalongi 12 kutya otaya lalekwa mo miilonga omolwonkalo yopamahupilo osho wo oonzapo dhuulongelwe ndhoka kaaye na.

Ashike nando ongaaka, aalongi ayehe mboka taya ka thiga po iilonga momasiku 1 Septemba ngaashi ya tseyithilwa kelelo, oomboka kwa li yi ishangitha okuninga iilyo yehanganokalelipo lyaalongisikola lyedhina Teacher's Union of Namibia (TUN).

Onzonkundaneki ndjika omwedhi gwa zi ko oya kundaneke kombinga yaaniilonga 22 yoposikola ndjoka, ya yaimine ehanganokalelipo lyoTUN, ashike kasha li sha nyanyukilwa kelelo lyosikola.

Aalongi posikola ndjoka oya popi kutya okuza sho ya waimine ehanganokalelipo oya kala taya ningilwa omambandameko noya popi kutya konima sho ya waimine ehanganokalelipo ndyoka, muJuni inaya pewa oondjambi dhawo pethimbo.

Omukuluntuwiliki gwosikola ndjoka, Jerry Lwande, okwa popi kutya osikola yawo oya tokola okulaleka aaniilonga yamwe nomatompelo ga yooloka ngaashi uunkundi wopashimaliwa omolwomahupilo ngoka taga kanda omapunya, sho yi na aaniilonga oyendji unene ye vule mboka taya pumbiwa osho wo okumangulula aalongi mboka kaaye na oonzapo.

Lwande, ngoka omundohotola mOndangwa, okwa popi kutya osikola yawo oyi na aaniilonga kumwe ye li 43 naanasikola ye li po420, noongulusikola dhimwe odhi na aalongi ya konda puyatatu – mongundu yimwe.

“Otwa tokola kutya omolwonkalo yoondando dhmahooli nodhiinima yilwe tadhi londo, itatu vulu we okukala naaniilonga oyendji molwashoka noofuto dhaanasikola inadhi gwedhelwa.

“Inatu hala okugwedhela ofuto yosikola manga, molwashoka uupyakadhi woshimaliwa owa guma kehe gumwe,” osho a popi ngaaka.

Osikola ndjoka Northcote, oyi na oshitayi shondondo yosekundo tashi adhika momukunda Oniiwe moshitopolwa shaShikoto, ndjoka yi na oondondo okuza pontihetatu noya patuluka mo2021.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.