Osikola yomOmusati ya pewa iitaafula niipundi … aanasikola ya kala taya longelwa pevi

OSIKOLA yomoshitopolwa shaMusati ndjoka ya kala naanona ye li po200 taya longelwa pevi [polupanda] moongulusikola molwashoka kaya li ye na iipundi niitaafula, oya mono ekwatho oshiwike sha zi ko.

Ngoloneya gwoshitopolwa shaMusati, Erginus Endjala okwa popi kutya ombelewa yElelo lyOshitopolwa shaMusati oya tokola okugandja ekwatho lyiipundi niitaafula kumwe yi li 200 kosikola ndjoka yedhina IK Tjimuhiva Combined School oshiwike sha zi ko.

Kakele kwaashoka, ehangano lyedhina Shi-Ndji Trading CC melongelokumwe nehangano lyedhina Tulikwateseni Fishing oga gandja kumwe iipundi yi li 70 kosikola oyo tuu ndjoka. Iipundi niitaafula mbyoka oya thikithwa kosikola ndjoka oshiwike sha zi ko.

Omakwatho ngoka oga landula ehokolo tali etitha ohenda ndyoka lya li lya nyanyangidhwa konzonkundaneki ndjika momasiku 4 Maalitsa kombinga yaanasikola ye li po200 yomondondo 9 no10 mboka ya kala taya longelwa pevi moongulusikola.

Omukuluntu gwo-Shi-Ndji Trading CC, Frans Indji, okwa popi kutya okwa li u uvithwa nayi kehokolo ndyoka a lesha monzonkundaneki ndjika.

Okuza mpoka okwa kwatathana mbala nehangano ekwawo lyedhina Tulikwateseni Fishing, opo li mu kwathe iipilangi.

“Ongehangano otu na oshinakugwanithwa shokukwathela oshigwana molwashoka osho hashi tu yambidhidha,” osho Indji a popi ngaaka.

Pethimbo lyegandjo lyiitafula niipundi mbyoka, omukuluntu gwelongo moshikandjolongo shaRuacana, Vilho Shimhanda, okwa gandja omapandulo komakwatho ngoka ga pewa osikola ndjoka, nokwa popi kutya okwa li ye li mompumbwe onene.

Moonkundathana nonzokunandaneki ndjika pethimbo taya kongo ekwatho, Gehas Iiyambo, omulongi posikola mpoka, okwa popi kutya osikola yawo oya kala nompumbwe yiitafula niipundi okuza omumvo gwa zi ko.

“Otu na oongundu ntano dhondondo 10 posikola ndhoka kehe yimwe yi na aalongwa ye li pokati ko40 no50. Pethimbo lyekonakono lyopashigwana omumvo gwa zi ko, okwa li twa longitha iipundi niitafula okuza koongundu dhilwe,”osho a popi ngaaka.

Okwa popi kutya osikola ndjoka oya nuninwa aalongwa 700, ashike mongashingeyi oyi na aanasikola ye li 1 264, moka ye li 1 132, haya zi momuhandjo.

“Omihandjo odhu udha epitilila. Aavali oyo haya landele aanona yawo omatalashe, nokoombete aanona ohaya lala ko nooyakwawo. Aanona oyendji nokuli ohaya lala owala polupanda omolwombete ndhoka inaa dhi gwana,” osho Iiyambo a popi ngaaka.

Okwa gwedha po wo kutya posikola yawo natango opu ompumbwe onene yaalongi, nosaala yokulila oyi li omwaka oshoka kayi na iitafula niipundi.

Omukuluntusikola ta kwathele posikola ndjoka, Mbendeka Temistokles, okwa popi kutya onkalo yokwaana iipundi niitaafula okwa li ya nayipala sho osikola yawo ya pewa oongulusikola oompe dhi li 22 omumvo gwa zi ko, ashike uuministili inawu ya pa iiipundi niitaafula. Osikola ndjoka otayi adhika momudhingoloko gwaMakange.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.