Oshiwiha sha Agra otashi longo nawa

IILONGITHO yopashinanena mbyoka ehangano lyuunamapya lya Agra ta li longitha oku hwepopeka omayakulo kaanafaalama oya ulike ongushu yayo momalanditho giimuna ngoka ga li ga ningwa omathimbo ga piti muumbugantu woshilongo.

Oshiwiha hashi endwa nasho shokuyeleka ondjundo yiimuna osha li sha longithwa lwotango pomalandithilo gopoofaalama ya Stofbakkies na Samehaling popepi na Aroab. Omalanditho ngaka oga li woo gotango taga landitha iimuna iinene yomwaalu gwo mathele 553 muumbugantu woshilongo. Konyala iinamwenyo ayihe mbika yomwaalu nguka ya li ta yi landithwa oya landwa po kaalandi kondjele yopokati yoodola omayovi 4 275 kehe shimwe omanga omitanda odha landithwa kondando yoodola 19,81 mokilograma yimwe. Pomalanditho po Karasburg momasiku 16 ga Maalitsa, oongombe 460 odha li tadhi landithwa moshitopolwa shika shi shiwikilwe elanditho lyiikombo. Oongombe adhihe dhomwaalu ngoka odha li dha landithwapo, kondjele yoodola omayovi 4 165 mongombe yimwe. Omanga omitanda ndhoka dhondando yopombanda odha landithwa koodola 20,06 mokilograma yimwe. Omuunganeki gwomalanditho giimuna moshitopolwa shika, George Pearson okwa ti yo oya longo noonkondo okulongekidha omalanditho ngoka, nomalongekidho ngoka oga eta oshinima shi ende nawa. Okwa ti omwaalu gwaantu pomalandithilo, omwaalu gwiimuna pomalandithilo noshowo oondando ndhoka aalandithi ya pewa okuyeleka noondando komahala hoka haku landithwa iimuna olundji osho etompelo nonkalo yeinekelo lya Agra kutya omalanditho giimuna muumbugantu otaga kala nokweenda nawa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.