OSHIGWANA osha yamukula ishewe nongeyo kushoka sha talika ongelongithonayi lyiiyenditho yepangelo pethimbo ku na okwiimangwa epaya, sha ningwa mehuliloshiwike lya piti konima sho omathano tagu ulike eshete lyepangelo tali longithwa iilonga ya fa yopaumwene ga holoka komapandja goohungi dhanakanena.
Oshigwana osha hwamekwa komathano tagu ulike aalumentu taa londeke ooshako dhosamende meshete (Mercedes-Benz) eluudhe, lyonomola yepangelo GRN 81, poshitayi shongeshefa yoCashbuild.
Inashi kuthwa mo nawa kutya omathano oga thanekelwe uunake, nuuyelele kombinga yaangoka i inekelelwa oshihauto shika otawu nyangwaanyangwa, ihe mboka ya mona omathano oyi indile okomisi yokukondjitha iilonga yedhengelo lyondhi peho, ACC, yi ninge omakonakono.
Onzonkundana ndjika oya kambadhala komukalo kehe yi mone uuyelele kaanambelewa yepangelo kombinga yaangoka i inekelelwa osheenditho shika, ihe oonkambadhala dhasho, sigo opethimbo lyenyanyangidho lyoshinyolwa shika, odha hulile muunyengwi.
Amushanga omukuluntu moshikondo shiilonga nomalweendo moNamibia, omusamane Willem Goeiemann, okwa popile mOsoondaha kutya ohauto ita vulu oku yi dhimbulula molwashoka ke shi oonomola dhiiyenditho yepangelo ayihe.
Nando ongaaka, Goeiemann oku uvaneke ta ka tala momusholondondo gwoohauto dhepangelo a tale kutya ohauto yonomola ndjoka oyi li kedhina lyalye.
Omakemo kombinga yelongitho lyiiyenditho yepangelo miinima yopaumwene oga landula oshikumungu shomuJanuali shomathano gwomunashipundi gwegumbo etiyali lyopashigwana, Margareth Mensah-Williams, e li koCapetown, South Africa, pethimbo lyefudho neshete lyepangelo, ashike Mensah-Williams okwi ikanyuna ta ti okwa yile niilonga.
Nando Mensah-Williams a popi kutya okwa yile niilonga yopambelelwa, ina popya kutya okwa ka longele shike.
Pethimbo ndyoka, omukonakoni omukuluntu mo-ACC, Nelius Becker, okwa hololele kepandja lye koFacebook kutya kapu na sha sha puka ngele Mensah-Williams okwa ya koCape Town nohauto yiilonga.
Dhoka a popi odha holoka wo kepandja lyokomisi yokukondjitha iimbuluma koFacebook.
Becker okwa holola wo kutya aakwanepangelo inaa ngambekwa okulongitha iihauto yepangelo miilonga yopaumwene, yo inaa indikwa ye yi longithe pethimbo lyefudho, shimpa ashike iilonga yawo itayi nyanitha nokulengitha epangelo.
Sho a yamukula koshiningwanima oshitalala – sheshete lyepangelo tali londekwa oosamende, omukuluntuwiliki gwoshikondo shiimaliwa, omusamane Calle Schlettwein okwa yamukula kutya iihauto yepangelo otayi vulu ashike okulongithwa momalweendo gopaumwene meni lyoongamba dhaNamibia, tashi ningwa uuna pwa gandjwa omukandapitiko gwolweendo ndoka.
Nando ongaaka, Schlettwein okwa fa ashike a yamukula koshiningwanima sholweendo lwaMensah-Williams, ihe hakoshiningwanima shopaife, naadhoka a popi odha fa itadhi tsu kumwe nefatululo lyaBecker.
Minista Schlettwein okwa ti oshikondo shiimaliwa osho shi na okugandja epitikilo opo osheenditho shepangelo shi longithwe pondje yoshilongo.
Schlettwein, nando ongaaka, okwa ti nando ACC oku li mondjila sho a ti aakwanepangelo oya pitikwa ya longithe iiyenditho yepangelo miinyangadhalwa yopaumwene, ACC okwa fa ina yalula oveta ndjoka yu utha ku kongwe epitikilo kuuministeli wiimaliwa.
Schelttwein okwa ti iiyenditho mbyoka tayi popiwa oyepangelo yo inayi shangithwa komahangano omashilipaleki, onkene uuna tayi logithwa pondje yoshilongo, oshi na okuningwa papitikilo lyoshikondo shiimaliwa.
Becker ina vula okumonika opo a tye ko sha.
Oshiningwanima shelondeko lyoosamende meshete lyepangelo osha yembwa koyendji, ye shi ningi okupitila miikundaneki yokointaneta.
Aantu yamwe oya hala epangelo li ye po nomulandu omupe opo ku thiminikwe aanapolitika ya kale haa futu omahooli ngoka taa longitha yo yene.
Gumwe gwomaakomendi okwa ti okulondeka oosamende motuukala yepangelo osho wo okuya koshilongo shilwe nosheednitho shepangelo pethimbo lyefudho otashi nyanitha nokusitha ohoni epangelo.
“Ngele ACC okwi itula mo shili, omolwashike he etha iiyenditho yepangelo yi kale pookalaba momahuliloshiwike?
Inda ashike koshitopolwa kehe moshilongo, owu na okumona iiyenditho yepangelo tayi vuvagulwa momikunda.
Oohauto dhika odha kotha ondilo nohadhi pula oshimaliwa oshindji okukaleka po[…],” gumwe gwomoonakukomenda koFacebook ta ti.
Gumwe gwomaakomendi, Rowland Brown, okwa ti osha yele mo nale kutya okomosi yokukondjitha iimbuluma inayi hala okukondjitha iilonga yiimbulumba, nonkalo ndjika oyi na okulundululwa ngele omuleli gwoshilongo okwa hala shili okukondjitha evundakano.
Ndhika Brown okwe dhi nyola koTwitter.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
