Oshikukuta otashi topolwa nziya

OMINISTA onkuluntu meme Saara Kuugongelwa-Amadhila, ngoka e li ta talele po Iitopolwa yi ili noyi ili moshilongo, okwa tseyitha kutya etopolo lyiikulya yoshikukuta otali tameke momwedhi tagu ya, Septemba 2015, naatopoli otayi indilwa ya ka topole nawa iikulya mbika, ye yi topolele mboka ye yi pumbwa shili, ihe haku longa uulingilingi.

Omukuluntuminista Kuugongelwa-Amadhila ta ti moshikando sha zi ko, epangelo olya longithile oomiliyona N$300 megandjo lyoshikukuta, omanga nuumvo lya thaneka pu tulwe oomiliyona N$500million lwaampoka.

Minista Kuugongelwa-Amadhila ta lombwele wo oshigwana shokoshikandjohogololo shUuvudhiya kutya omumvo nguka omumvo gwoshikukuta mokati kaantu yoyene niimuna yawo, momumvo moka aantu ya pumbwa iikulya nosho wo omeya. Omumvo moka iimuna ya pumbwa iikulya nosho wo omeya. Onkee, ta ti, epangelo olya kaatumba notali ka kaatumba natango molwonkalo ndjika ya yaga kegonga, ku talwe ngele oshigwana niimuna yasho otashi ka hupithwa ngiini.

Ta ti epangelo lyomupresidente Hage Geingob olya lombwela ooministeli adhihe, naye wo a kwatelwa mo, a dhi ye koshigwana dhi ka kundathane noshigwana nodhi uve kutya oshigwana oshi na oompumbwe dhashike, sho tashi gandja omathaneko nomayele opo ya galuke naambyoka ayihe ee taye yi kalele omutumba noku yi dhinda, ku talike kutya oompumbwe dhoshigwana otadhi ungaungiwa nadho ngiini nokukandulwa po wo ngiini.

Kuugongelwa-Amadhila ta lombwele oshigwana kutya omupresidende Geingob okwa hindi iita yoluhepo, ano kukondjithwe oluhepo mokati koshigwana ngashi tashi vulika.

“Ano tu longeleni kumwe neitulomo enene opo tu eteni po sha shomupondo. Tu yambidhidheni mbokaa twa hogolola ye tu kalele po, opo tu eteni po elunduluko moshinima sholuhepo moshilongo shetweni. Omupresidende oku ulike aasita yaali, omusita Zephania Kameta nomusita Aino Kapewangolo ya ninge aanani dhoshikondo shokukondjitha oluhepo nuuthigona mokati koshigwana.

Onkee natu ya yambidhidheni monkambadhala ndjika onene noya simana mokati koshigwana shetu shi li moluhepo,” Kuugongelwa-Amadhila ta ti nokutsikila ko ta ti molwaashoka omupresidende okwa hala oku uva uudhigu woshigwana nashoka sha hala epangelo li ninge po, okwa tula po omulandu gwokuya koshigwana koshitopolwa noshitopolwa nokuninga oonkundathana nasho, opo a ka tule miilonga shoka sha pumbwa okutulwa miilonga meendelelo.

Ominista onkuluntu tayi ti omboloto yaakulupe, oothigwa naanuulema oya gwedhelwa notashi kandula po oluhepo mokati koongundu ndhoka moshigwana. “Uuthigona owu na okukondjithwa ee tawu lethekwa po thiluthilu,” Kuugongelwa-Amadhila ta ti nokwi indila kaakuluntu ya longe aagundjuka, sho oshigwana oshigundjuka shi kuthe ko eilongo lyasho noonkondo opo shi yambule po oshilongo nokugwanithwe ondjodhithaneko yoko2030, Namibia a kale a huma komeho noku li pomuthika gwiilongo ya putuka muuyuni.

Okwa ti epangelo otali hwahwameke elongo lyiikulya ya gwana nendiki lyoku yi pungula opo pu kale iikulya ya gwana sho oshigwana shi vule okutopolelwa iikulya.

Kuugongelwa-Amadhila ta ti wo opu na oshimaliwa shokuyambidhidha aanyasha mboka ya hala okutota oongehefa nokwe ya indile ya longithe ompito ndjoka. Okwa gwedha po kutya epangelo otali ka kondja okwaandjaganeka omeya nolusheno moshigwana, okutunga oondjila nokugandja evi lyomalukalwa kaakwashigwana, unene tuu kaagundjuka opo kehe gumwe a kale neha lyokukala.

Kuugongelwa-Amadhila okwa ti wo otaku ka kolekwa omalelo giitopolwa opo omayakulo gepangelo ga thikithwe koshigwana.

Ta ti oshinima shAanambelewa yamwe itaya longo nawa otashi ka mona ehulilo molwashoka kehe omunambelewa ota ka ganithwa nokuuvaneka kutya ota ka longa shili neitulomo nokuyakula oshigwana ngashi a tegelelwa e shi ninge.

Ooministeli nadho otadhi kala tadhi gana komeho gomupresidente kutya otadhi ka longa nuudhiginini mokati koshigwana, unene tuu nelalakano lyokukutha po oluhepo mokati koshigwana.

Edhina lya pewa aanambelewa aakuluntu miikondo yepangelo, amushanga ta kalelele, otali ka kuthwa po, oshoka, minista ta ti kapu na amushanga ta kalelele.

Ta ti otaya ka kongelwa edhina limwe li ili. Okwa kumagidha wo oshigwana shi ikaleke kokule niikolitha niihulo.

Aakalimo yokoshitopolwa hoka oyi indile epangelo li ya tungile oondama nomatale gomeya, oondjila, oosikola noshowo uukilinika noku ya kwathela moluhepo lwawo olunene lwuulithilo nuumvo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.