OSHIKANDJOSIKOLA sha Nyuulaye shoka tashi wilikwa kOmutalelisikola gwasho, Abraham Nafine, meti 4 Oktoba 2011 osha gandja omagano giikulya niizalomwa kOshitopolwa sha Shikoto, sha ningilwa pOombelewa dhOshikandjo sha Nyuulaye pOnyuulaye.
Omagano ngaka oga pewa Gavena yOshikoto, Penda yaNdakolo, ngoka a li a ende pamwe nOmugandjimayele gwe Omusita, Hosea Namupala, e ga pewa nee kOmutalelisikola shoka, tate Nafine.Oshituthi shegandjo lyomagano ngaka, osha li wo sha kalwa ku Kaansela gwOshikandjohogololo sha Kankolo, Joseph Imbili, Kaansela gwOshikandjohogololo sha Nayena, Max Nekongo ngoka wo e li Omunashipundi gwElelo lya Shikoto noshowo kOmunambelewa Omukuluntupitithi mOmbelewa yoshikandjohogololo sha Kankolo, Christopher Mukumbuta. Osha li wo sha kalwa kAakuluntusikola yOosikola dhimwe mOshikandjosikola shoka sha Nyuulaye, kaalongisikola noshowo kaanambelelwa nokaaniilonga mOshikandjosikola shoka, ngashi komukuluntusikola gwOseko yOpombanda ya Nguti (ya Kankolo) John Toivo, Omukuluntusikola gwOsikola yaanona ya Shana, Moses Tjirimuje, Omukuluntusikola gwOsikola Onampengu PS , Ananias Nangolo, Omukuluntusikola gwOsikola yUutala PS, Lusia Shigwedha, Omulongisikola pUutala, Ailly Shilemba, Omulongi gwOonzo dhOpalongo mOmbelewa yOmutaleli, Werner Lenga, Oshilyo shElelosikola Oshana, Helena Toivo, Omuwapaleki moombelewa dhOshikandjosikola , Emilia Ndengu. Mokugandja omagano ngaka ku Gavena yaNdakolo, Nafine okwa ti kutya Oshikandjosikola she shoka oshipeepeeka, sha totelwe po momumvo 2008, shi na Oosikola adhihe kumwe 34, dhopaendondo dhi ili nodhi ili, aalongi 285, aalongwa 8687, Oomatrona 6, aaopaleki 33, Omutaleli nAanambelewa ye, osha ninga etokolo shi gandja omagano giikulya koonakuhepekwa kefundja mOshitopolwa sha Shikoto. Ta ti sha yi, maaniilonga moka noshowo maavali mboka nayo ye shi zimine kutya nakugongelwe oshimaliwa shi lande iikulya niizalomwa yi pewe oonakuhepekwa kefundja ndyoka lya li lyi iteyele moshitopolwa nuumvo nokuhepeka oyendji ya guminwe kulyo. Tate Nafine ta ti oya gongele po nee oshimaliwa shomwaalu gwomayovi gontumba nokulanda nasho iinima ngashi, omanyangwa (69), oolata dhOmakunde (29), oolata dhomapungu (34), oolata dhiilya yomahangu (47),oolata dhiilya yiilyaalyaka dhi li 14, omakaka gane (4) noshowo nee omagadhi gokuteleka omakende go 750ml ge li 24 noshowo nee oonguyo dhoomeme, oongaku noshowo oohema noombulukweya dhootate.Mokutaamba ko omagano ngaka Gavena Penda yaNdakolo okwa pandula noonkondo Oshikandjosikola sha Nyuulaye kumwe nOmuatleli gwasho, aalongisikola, aanona naavali sho ya ninga etokolo ewanawa lyokugandja omagano, unene giikulya koonakuhepekwa kefundja mOshitopolwa sha Shikoto. Ta ti Elelo lye lya Shikoto nEpangelo alihe lya Namibia, olya pandula noonkondo oshinima shika oshiwanawa shi na sha neuvoko lyuukwawowanankali moshigwana. Gavena yaNdakolo ta ti omathimbo agehe ngoka ga zi ko, Epangelo olya kala nokwiigidha tali indile kAanamibia ya kuthe ombinga metungopo nehumithokomeho lyoshilongo nolyoshigwana shoshene, na oshi li lela nawa sho oshigwana shomOshikandjohogololo sha Kankolo shomoshikandjosikola sha Nyuulaye, sha uva ko eigidho ndika nokukwathela ngeyi aamwayina ya monithwa iihuna kefundja lya zi ko. ‘ Pehala lyElelo lya Shikoto noshowo lyEpangelo nolyoonakuhepekwa kefundja mboka tamu pe omagano nena ngeyi, onda hala oku mu pandulila omolu edhilaadhilo netokolo lyeni ewanawa ndika. Nonande Okankolo kokene ina ka gumwa naanaa komeya gefundja, opu na iikandjohogololo yimwe mOshitopolwa sha Shikoto ya gumwa kefundja na otayi ka pandula okupewa omagano gatya ngeyi,’ Gavena ya Shikoto tate yaNdakolo ta ti ngawo nenyanyu nokwiindila kuyalwe wo moshigwana, unene mOshitopolwa she ya landule oshiholelwa oshiwanawa sha gandjwa kOshikandjosikola sha Nyuulaye ngeyi.Ehala ndika omanga oshilongo inaashi manguluka olya li wetike li kokule neputuko omolwa omakwatathano gali gaapo nawa.
