Oshihauto shaalikoli yomagungu sha faalelwa komeya

OSHIHAUTO sha humbata aalikoli yomagungu 12, mwa kwatelwa nomuhingi, osha faalelwa komeya pethimbo sha li tashi kambadhala okutaaguluka omulonga momukunda Otjivize momudhingoloko gwaPuwo.

Pauyelele wa gandjwa kukomanda gwopolisi yaKunene, James Nderura, oshiningwanima shoka osha ningwa ongulohi yEtitatu lwopotundi 22h00, naakwashigwana yatatu oya hulithile mo oondjenda.

Komanda okwa hokolola kutya ongundu ndjoka yaalikoli yomagungu oya zi koshitopolwa shaMusati noya li moshihauto shobakkie nopethimbo lyoshiningwanima oshihauto shoka osha adhika sha zi kOpuwo sha thinda kOkangwati hoka ya li taya ka likola omagungu.

Ashike nando ongaaka omanga ye li omukaakena gwookilometa 30 okuthika kOkangwati, oshihauto shawo osha adha omulonga ngoka ya kambadhala okutaaguluka momukunda Otjivize, noshihauto osha faalelwa.

Moshiningwanima moka omwa hulithile aantu yatatu mboka lwanima ya kuthwa momulamba gwomeya kopolisi, mEtine.

Aafalelwa yalwe ye li omugoyi okwa li ye shi pondola okuyoga sigo okomutunda nokwa li ya pewa ekwatho lyopaunamiti pokapangelo kaKangwati.

Nderura okwa londodha oshigwana shoka tashi ende pethimbo lyokongulohi, pethimbo ndika lyomuloka shi kale sha lungama oshoka omilonga odhi na omeya gondjele yi li pombanda.

“Omvula okwa li tayi loko kongulohi. Ashike nando ongaaka aantu mboka oya tokola okuhinga, omanga inaa ya nongela kutya ehala ndyoka ohali kala nomeya taga tondoka. Oshinima tashi uvitha nayi. Onda hala ashike okulondodha aantu ya yande okutaaguluka omilonga pethimbo lyokongulohi, unene tuu pethimbo ndika taku lokwa, molwashoka ito tseya nuupu ngele omeya ngoka to taaguluka omale shi thike peni,” osho a popi ngaaka.

Okuza iiwike ya piti aakwashigwana oyendji unene tuu mboka kaaye na iilonga oya mbombolokele pomahala ga yooloka oku ka likola omagungu osho wo omaankowa ngoka ge holike koyendji.

Aalikoli oya popi kutya omagungu ngoka ge li ko numvo oge ya pa ompito ombwanawa yokwiimonena sha shomoondjato okutala kutya onkalo ngashingeyi paliko otayi kanda omapunya noyendji oya kanitha nokuli iiyemo omolwetukuko lyombuto yocorona.

Ashike petameko lyoshiwike sha zi ko, omukwatakanithi gwomakonakono giimbuluma mopolisi yoshitopolwa sha Kunene, Paavo Iyambo, okwa londodha aakwashigwana ya yande okuthawela moofaalama dhaantu okukalikola omagungu.

“Otwa kala nokuyakula omanyenyeto okuza kooyene yoofaalama dhomomudhingoloko gwOutjo okuza momasiku 24 Maalitsa kombinga yaalikoli yomagungu mboka taya thawele momahala gaantu pwaana epitikilo,” osho a popi ngaaka.

Iyambo okwa popi kutya ooyene yoofaalama oya kala haya gandja ompito kaakwashigwana ya likole omagungu moofaalama dhawo ashike oya ndhindhilike kutya ohaya thigi ya yonagula nokuyaka mo iinima yawo.

“Onkene ooyene yoofaalama inaya hala we okupitikila aalikoli moofaalama dhawo noya pula nokuli opolisi yi ya kwathele moshinima shoka,” osho Iyambo a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.