Opolitika oyo ya hwahwameka iipotha nda taalela – Amushelelo

MICHAEL Amushelelo ngoka ta fekelwa uukengeleledhi moshiningwanima shomapungulilo, okwa holoka mompangu yopombanda yaVenduka mEtitatu nokwa popi kutya iipotha mbyoka a taalela okwe yi tulilwa mo sha hwahwamekwa kopolika sha landula sho a li a kondjitha epangelo lyongundu yoSwapo.

Moonkundathana nonzonkundaneki ndjika, konima sho Amushelelo nomufekelwa pamwe, Gregory Cloete, ya holoka mompangu uunambo, [Amushelelo] okwa popi kutya etulo lye miipandeko nokukala ngashingeyi a taalela ompangu osha hwahwamekwa kopolitika molwashoka okwa li e na olunyala mopolitika sho a li a toto po ongundu ye yopapolitika yedhina “Power” opo yi kondjithe ongundu tayi pangele yoSwapo, mo2019.

Amushelelo okwa popi tati: “Otuli moshilongo noonkoshi osho wo omambungu ngoka haga tokola kutya onzi yi ni kaage hole, osho wo [onzi] ndjoka ye na okukwata po. Onkene, ngame onda ningi omupya, oshoka ongame onzi yopapolitika ndjoka ya kwata po,” osho a popi ngaaka.

Okwa gwedha po natango tati: “Oshinima shoka ompangela, ya zi kepangelo oku ulika kutya kehe ngoka ta ka ninga onkambadhala yokukondjitha epangelo, [epangelo] oli na okumona omukalo goku mu talitha nawa.”

Amushelelo – ngoka a holoka kompangu uunambo e li koompadhi dhowala, ombulukweya ombulawu osho wo ohema ontonkele – okwa popi kutya ina zala ongaaku molwashoka okwa kala ta landitha po “iinima ye ayihe yongushu” opo a gongele oshimaliwa shiifuta yoohahende, nokwa hala wo oku ulika kutya iinima ye ayihe mbyoka a li e na okwe yi kuthwa nokwa dhigwa oonyala dhowala.

“Ondi li koompadhi dhowala ndi ulukile ompangu kutya oya dhiga ndje amunkele, naashoka etameko owala,” osho a popi ngaaka.

“Onkene, oshikando tashiya otandi ya ko kompangu inaa ndi zala ohema, nenge inaa ndi zala ombulukweya, opo ya mone kutya oya thiga ndje owala.”

Amushelelo naCloete okwa li ya holoka nokupatululilwa iipotha ya pamba ongeshefa yawo yomapingakanithi goshimaliwa muKotoba 2019.

Kumwe otaya tamenekelwa iipotha yi li 348, yekengelelo, uufuthi okupitila mokatoo, uukengeleledhi wopashimaliwa, okukutha aantu oshimaliwa nomukalo gwaali paveta, okuninga ongeshefa ya pamba ombaanga shaa li paveta – shoka shi li ompinge nOveta yOombaanga, uukengeleledhi wiifuta yokongulu, osho wo endopo lyokufuta iifuta yokongulu.

Epangelo otali tameke kutya, okuza muSeptemba 2018 sigo omuKotoba 2019, Amushelelo naCloete oya kala nongeshefa yuukengeleledhi mboka ya kala taya uvanekele aakwashigwana oshimaliwa sha kola uuna ya gandja iimaliwa yawo kuyo. Aanangeshefa moka oya kala nee taya taamba oshimaliwa okuza kaakwashigwana nokuya tseythila kutya otaye shi ngeshefa komapingakanitho goshimaliwa shokondje yoshilongo opo shi tane, naashoka oya kala taye shi ningi okupitila mongeshefa yawo tayi ithanwa Global Growth Investment Namibia.

Otaku hokololwa kutya aakwashigwana ye li 348 mboka ya li ya kwatwa ko kongeshefa yaAmushelelo naCloete, oya gandja kumwe oomiliyona dhi li pooN$14,7 nelalakano lyokungeshefelwa anuwa kepingakanitho lyiimaliwa yopondje yoshilongo yo ya galulilwe oshimaliwa sha kola.

Peha nee lyokulongitha omukalo ngoka taya popi gwepingakanitho lyoshimaliwa, Amushelelo naCloete oya kala owala taya unganeke ashike etopolo lyoshimaliwa moka mboka ya gandja oshimaliwa kuyo hugunina osho haya gandja kwaamboka ye ya pe oshimaliwa tango “onkene oshimaliwa shoka oya kala ashike taye shi dhingolokitha momake gaamboka taye ya pe oshimaliwa”, noshinima shoka paveta epangelo otali ti kashi li paveta.

Aagandji yoshimaliwa kongeshefa ndjoka otaku hokololwa ya hokwa unene kelombwelo lyokutya uuna ya gandja oshimaliwa shooN$5 000 nena otaya ka galulilwa oshimaliwa shawo kwa gwedhwa oopelesenda 50 konima yoomwedhi dhi li pokati kambali nane. Ayehe mboka yaali, okwa li ya egululwa mo mondholongo sho yi iboloha mo noo-N$35 00 noya kalelwa po kuhahende Kadhila Amoomo. Oya tegelelwa ya ka holoke mompangu momasiku 29 Maalitsa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.