Opawa ya pewa omagano kundokotola Haufiku na Sanlam

OSIKOLA ya Opawa Primary School popepi nOnheliwa moMusati meti oya pewa omagano kOmundohotola Benhard Haufiku nokEhangano lya Sanlam Namibia, ga taambiwako kOmukuluntusikola gwOsikola ndjoka meme Ottilie Ananias.

Omagano ngoka ga pewa osikola ndjika ku Haufiku, oga kwatela mo nee Otelefona yokOpaala, Eshina lyokwiindjipaleka oombapila lya kwatela mo iinima oyindji, Uusikopa wokutula mo omambo gOsikola noshowo Oodokumende dhi ili nodhi ili nIimaliwa, ya za kuye mwene noshowo kookuume ke, ngashi ku tate Robby Amadhila ngoka a gandja omagano gooN$1100 noshowo tate Boas Haupindi ngoka e ya pe omagano gooN$600 na meme Eila Dume, ngoka a gandja omagano gooN$200, omanga Sanlam agandja otjeke yooN$1000.Oshituthi shegandjo lyomagano shika, sha li sha longekidhwa nawa lela, osha li sha wilikwa kaalongisikola aagundjuka Ndeyapo Ananias na Aune Shinyemba. Omukuluntusikola meme Ottilie Ananias okwa egulula oshituthi shika pambelewa nokugandja wo ondjokonona yOsikola yawo ndjika.Meme Ananias ta ti Opawa oya totwa po momumvo 1984 sho kwa monika kutya aanona yomomukunda gwawo Ohakadu noyomomudhingoloko ohaya ende iinano iile okuya kOosikola dhomuushiinda, ngashi unene kOnheleiwa. Mwene gwomukunda Ohakadu, Tatekulu Absalom Ananias (Katupya) oye a luku osikola yawo ndjika Opawa, tashi ti a hogolola ehala mpoka pu na okutungwa osikola ndjika, ta ti mpaka opuuwanawa, ano opawa noya lukwa nee ‘Opawa’.Osikola Opawa pethimbo ndika oyi na Ooklasa omulongonahamano lwaampoka noshitsali shimwe tashi longithwa natango. Aalongwa oye li lwopomathele gaheyali lwaampoka, aalongisikola omulongonomugoyi, mwa kwatelwa Omukuluntusikola noshowo omuopaleki. Osikola oya tungwa nawa, yi li molugumbo oluwanawa, ya yela nawa, yi na uutoileta oundji, ashike kayi na olusheno natango.Mokugandja omagano ge, Omundohotola Haufiku, ngoka a valelwa pomudhingoloko nokuhita wo Osikola pomudhingoloko mpoka, ngashi pOnamidi nopOnheleiwa, omanga inaya a ka sikole, koDobra noshowo nee kOouniversity dhe kOokapa hoka koSouth Africa, okwa pandula noonkondo kwaamboka ya eta po Osikola ya Opawa.Ta ti omagano ngoka ine ga gandja sho ngeno e na iimaliwa oyindji, ihe okwe shi ninga a hala okukwathela oshigwana shokomongula shoka shi na oshinakugwanithwa oshinene shokwiilonga nawa, shi kale shi na uunongo noondunge dhokuwilika oshilongo. Ya ka ninge Oondohotola naawiliki yomaithano gi ili nogi ili.Omundohotola Haufiku ta indile a mana mo kaansikola yopOpawa ya ethe po iinima yi ili kayi na noshilonga, ngashi iikolitha, uukawalala nosho tuu, ihe yi longe nuudhiginini opo ya ka ninge aanashilonga miinima yi ili noyi ili opo ya ka vule okuhumitha komeho oshilongo shawo Namibia naantu yamo, unene tuu wo okukwathela Oosikola dhawo opo oshigwana shi kale sha longwa. ‘Elongo olyo oshipatululo shOnkalamwenyo, onkee kaleni mwa dhama melongo ngashi ongupa ya dhama pongombe’.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.