Ootuukala dhiipundi iheyali dha indikwa okupita pomboloka

AAFAALELWA mboka ya li pehala lyo-B1 moshilandopangelo ye na etegameno lyokuya kehuliloshiwike lya piti lyopaasa komunkulofuta, oya thigwa pomutenya mEtine lya zi ko, sho opolisi ya tindi okupitika iihauto yootuukala dhiipundi iheyali yi pite po pomboloka yokuza mOvenduka.

Pauyelele wa zi komukalelipo gwaahingi yootuukala dhiihauto yiipundi iheyali, Timo Shiwalo,ootukala ndhoka odha shunithwa mOvenduka netompelo lyokutya kaye na omikanda dhokufelefula.

Shiwalo okwa popi kutya mEtine omwaalu gwaantu oyendji mboka ya li ya hala okuya kehuliloshiwike lyopaasa komunkukulofuta okwa li gwa ngundumana posasiona yomahooli go-B1, mpoka opo haya londekelwa okuya komukunkulofuta molwaashoka kapwa li iihauto ya gwana oku ya fala komahala hoka ya li ya thinda.

“Otu na oofamili dhetu, notwa hala okwi imonena iiyemo,” osho Shiwalo a popi ngaaka.

Amushangandjayi gwehanganokalelipo lyaahingi yokufelefula lyo-Namibia Public Passenger Transport Association (NPPTA), Nathan Africa, okwa lombwele onzolundaneki ndjika mEtitano kutya opu na aahingi yootuukala dhiipundi ihayeli mboka ya pewa omikanda dhokufelefula.

Pauyelele wa gandjwa kuAfrika, muMaalitsa aahingi yiihauto yokufelefula mboka kaaye na omikanda dhopaveta okwa li ya londodhwa kuuministili wIilonga nIiyenditho, kutya kashi li paveta oku kala taya felefula omanga yaana omikandapitikilo dhoku shi ninga.

Okwa popi kutya ngashingeyi olufo lwomalondodho olwa hula onkene opolisi otayi longo iilonga yawo yokutula oveta miilonga.

“Aahingi yootuukala dhiipundi iheyali oye wete taya dhengelwa konankondongolo, ashike hayo ayehe, ndele otashi ningilwa iihauto ayihe mbyoka tayi longithwa okufelefula kaashi li paveta,” osho Africa a popi ngaaka.

Okwa popi kutya iihauto oyindji mbyoka yiipundi iheyali hayi kala po-B1 kayi na nande omikanda dhokufelefula nokwa londodha noku kunkilila aafaalelwa ya kale aluhe haya shilipaleke kutya moshihauto taya londo oshi na omukanda pitikilo gwokufelefula opo ashike ya yande okuthigwa pomutenya.

Omupopiliko gwuuministili wIiyenditho, Julius Ngweda, okwa popi kutya aahingi yootuukala dhiipundi iheyali oya pumbwa omikanda dhokufelefula opo ashike ya vule okufaalela aakwashigwana.

“Mboka taya popi kutya oya shunithwa ko, omolwaashoka kaye na omikanda dhokufelefula,” osho Ngweda a popi ngaaka.

Okwa popi kutya nonande ongaaka iihauto yootuukala dhiipundi iheyali oya pumbwa shike okufelefula momidhingoloko dha ngambekwa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.