Oonakushangwa metiti ya tila nakuyashanga a galukile kiilonga

Gumwe gomaaniilonga yOngalashe yEpangelo mOndangwa okwa popi kutya oya tila omuniilonga pamwe, Julius Shongolo, a galukile kiilonga sha landula sho Uuministili wIilonga nIiyenditho wa gandja elombwelo a shune kiilonga.

Sholongo okwa li a tilitha aaniilonga pamwe sho a shanga omadhina [gaaniilonga] yahetatu metiti ndyoka lyi itsuwika lya fumvikwa popepi nopate yopokati kaNdangwa naNgwediva, petameko lyomumvo gwa zi ko.

Uumbanda waaniilonga kombinga ya Shongolo ta ka galukila kiilonga, owa landula olopota yUuministili wUundjolowele nOmayakulo gOnkalonawa, yomasiku 11 Juli 2022, ndjoka ya popi kutya konima sho aahungimwenyo kwa li ya tuminwa kongalashe yepangelo mOndangwa opo ya popye naaniilonga, aaniilonga yamwe oya popi kutya oye niwe kuumbanda nokaye shi shoka tashi landula ko, sha landula oshingwanima ya ningilwa kuShongolo.

Mbala lwanima sho etiti lyomadhina lya monika, Shongolo okwa li a tokola okwiikutha omwenyo sho i iyaha nondjembo, ashike okwa hupu nokwa taambelwa moombete moka a kala uule woomwedhi ta mono uuhaku.

Omwedhi gwa zi, omukuluntuwiliki gUuministili wIilonga nIiyenditho, Ester Kaapanda, okwa gandja elombwelo kuSholongo a shune kiilonga kOngalashe yEpangelo, mOndangwa.

Uunambo, Shongolo (55) okwa tindi okutya ko sho a pulwa konzonkundaneki ndjika, nokwa popi kutya ota vulu owala okuyamukula kombinga yoshikumungu shoka uuna a pewa uuthemba kuuministili.

“Sho ta galukile kOngalashe yEpangelo, ngele okwa kambadhala ishewe oshinima shilwe nenge ngele mboka kwa li a shanga omadhina metiti oye muningile sha? Ngoka ta kala eshi ngele aantu ayehe otaya kala megameno olye? “ osho gumwe gomaaniilonga, ngoka a tindi edhina lye li tumbulwe, a popi ngaaka.

Pauyelele wombapila ndjoka kwa li ya shangwa kuKaapanda momasiku 3 Auguste, sha landula oshiningwanima shoka shoku shanga aantu metiti, Shongolo muAuguste omumvo gwa zi ko okwa li a lundululwa ko kOngalashe yEpangelo nokufalwa kOmpungulilo yEpangelo mOndangwa.

Ashike, muMaalitsa numvo, Shongolo okwa shanga ombapila tayi indile opo a shunwe kOngalashe yEpangelo.

“[…] elundululilo lyoye lyopakathimbo koshimpungu shoompungulilo mOndangwa, olya hulithwa po. Onkene, oto tseyithilwa wu shune kiilonga kOngalashe yaNdangwa mbala,” osho Kaapanda a shangele Shongolo ombapila ngaaka, omwedhi gwa zi ko. Ashike nando ongaaka, aaniilonga yomOngalashe yEpangelo oya popi kutya ombapila ndjoka inayi shainwa kuKaapanda.

Onzonkundaneki oya popi kutya ombapila ndjoka inayi tumwa pamukalo gwomondjila molwashoka oya tuminwa Shongolo paukililo peha lyokutuminwa oshimpungu shoka ha longele mongalashe yepangelo.

Ashike, omupopiliko gUuministili wIilonga nIiyenditho Julius Ngweda okwa lombwele onzonkundaneki ndjika kutya etokolo lyokushuna Shongolo kOngalashe yEpangelo olya ningwa sha landula omakonakono ngoka kwa li ga ningwa kuuministili, nolya ningwa wo pamulandu gwoveta.

“Etiti lye etha, molwashoka kapu na onkatu yopaveta ndjoka yi na okukatukwa shi ikwatelela kwaashoka[ketiti],” osho a popi ngaaka Okwa koleke kutya ombapila ndjoka okwa li ya shangwa komukuluntuwiliki guuministili wiilonga.

Ngweda, okwa popi kutya Shongolo ita vulu okuya kiilonga kOngalashe yEpangelo manga ombelewa onene yuuministili wiilonga mOvenduka inaayi mu lombwela a tameke.

“Sho Shongolo a tameke iilonga [okuza mefudho lyuuwehame) Aron Amakali okwa tindi oku mu pa iipatululo yombelewa ye (yaShongolo). Okwa kala ha kala mombelewa yokuningilwa iigongi. Okwa kala ha kala moshihauto she,” osho Ngweda a gwedha po ngaaka.

Omadhina gaamboka kwa li ya shangwa metiti oga kwatela mo, omukuluntu gwOngalashe yEpangelo mOndangwa Nande Amakali, omupevikuluntuwiliki gwongalashe Aron Amakali osho wo omukuluntu Mathew Ameya.

Aaniilonga yalwe ongaashi, omukuluntu gwomongalashe yepangelo Sam Kadhikwa, omutaleli Josephina Shekudja, omukonakoni muuministili Konstaatin, omukuluntu gwongalashe yaNdangwa ngoka ngashingeyi e li moshipundi shevululuko Tobias Emvula osho wo omukuluntutaleli gwiilonga George Kapofi.

Olopota yUuministili wUundjolowele nOmayakulo gOnkalonawa, yomasiku 1 Apilili 2022, oya popi tayi ti: “Sha landula oonkundathana, ongundu oya holola eikwato pomutima kombinga yonkalo yomuniilonga (Shongolo) palutu nopamadhiladhilo sha landula sho kwa li a ningi onkambadhala yokwiikutha omwenyo. Olopota ndjoka oya shainwa komukuluntuwiliki goshikondo shuundjolowele mOshana, Johanna Haimene.

Pauyelele wolopota ndjoka, etokolo otaku hokololwa lya ningwa manga Sholongo inaa shuna kiilonga.
Omakonakono gopaunamiti okwa li ge na okuningwa opo a monike ngele okuli ngaa nawa pamadhiladhilo nongele okwa pyakudhukwa ngaa shili okushuna kiilonga.

Ashike inashi yela nee ngele omakonakono ngoka oga ningwa.

Olopota kwa li ya ningwa kombinga yaaniilonga pamwe, oyu ulike kutya aaniilonga ye li 37 yomaaniilonga 41 haya longele mOngalashe yEpangelo oya popi kutya kaye li ompinge naShongolo a galukile kiilonga, ashike oyu uvite kutya “itashi kala nawa omusamane Shongolo a tsikile nokulonga pamwe naantu mboka kwa li a shanga omadhina metiti”.

Olopota yaahungimwenyo okwa li ya popi kutya onkalo mOngalashe yEpangelo yaNdangwa “otayi limbilike notayi pumbwa okuyapukilwa meendelelo”.

Amakali okwa tindi okutya ko sha koshikumungu shoka, nokwa popi kutya ota vulu owala okutya ko sha uuna a pewa olopota okuza kuuministili.