UUMINISTELI Woonakulwa aakulu owa koleke kutya opena ethaneko okupa ongundu yoonakulwa aakulu ya shewa omwaalu gwoodola omayovi omathele 200 000 kehe gumwe.
Omupopiliok guuministeli mbuka, Dan Kamati okwa ti ethaneko ndika olya gandjwa koKabinete opo ka gandje eziminino lyako. Sigo oompaka opwa kundanekwa kutya oonakulwa aakulu yashewa mbaka oye li lwopaantu 37. Kamati okwa ti oMinista yoonakulwa aakulu oya gandja ethaneko ndika lyoonakulwa mbaka 37 koKabinete opo ka gandje etokolo lyako opo mbaka ya futwe omwaalu ngoka gwoodola omayovi 200 000. Otaku tengenekwa kutya ongundu ndjika oya kwatelamo omundohotola Abisai Sheyavali, omubishofi Kleopas Dumeni, Andimba Toivo ya Toivo nomuprofesori, Mburumba Kerina.Pahapu dha Kamati, ominista Yoonakulwa Aakulu oyina oonkondo paveta yOonakulwa Aakulu oku tala oonkalo dhoonakulwa yontumba nokutokola nkene mbaka yena oku ningilwa.Okwa ti oye shi kutya opena ethaneko lyatya ngaaka lya ningwa ndele ita ya vulu okugandja uuyelele awuhe kombinga yomadhina ngoka geli momusholondondo ngoka gwaantu mbaka, unene tuu sho ngaka inaaga ziminwa natango koKabinete.Okwa ti ngaka ogena tango oku ziminwa koKabinete opo ihe oshigwana otashi tseyithilwa kombinga yago.Omusamane Simon Mzee Kaukungwa gumwe gwaamboka ta ku tengenekwa taya ka pewa iimaliwa mbika okwa li a kumwa okuuva onkundana ndjoka sho a pulwa ngele oku uva sha kwaashika. Na okwa ti ngele okwa pewa iimaliwa mbyoka ye ote yi taamba. Uuministeli Woonakulwa aakulu omasiku ga piti owa li wa gandja iimaliwa konyala yomwaalu gwa fa ngoka koonakulwa aakulu mboka ya gandja omathaneko gopangeshefa opo ya tameke oongeshefa dhawo , nenge ya humithe komeho ndhoka ya adhika yatameka nale.
