Oombudhi dha thigi aantu 6 000 kaaye na omeya

Oopomba ndhoka otaku hokololwa dha yakwa momikunda 13 dha yooloka miikandjohogololo ngaashi shaMpungu, shaNcuncuni, shaMusese, shaNcamagoro osho wo shaKapako, sha ningwa pokati kaSeptemba nomwedhi nguka.

Omukuluntu gUuministili wUunamapya nUuniimuna, Omeya nEtendululo lyEvi moshitopolwa shoka, Richard Shikongo, okwa koleke oshiningwanima shoka, mEtine lya zi ko.

“Aantu lela oyendji mboka ya gumwa osho wo iimuna. Ondi wete … kutya aantu ya konda po6 000 oya gumwa,” osho Shikongo a popi ngaaka.

Okwa popi kutya uuministili opamwe naakwashigwana oya patululila oshipotha oonakulonga oshikoya shoka.

Okwa popi kutya dhimwe dhomoopomba ndhoka odha adhika owala opo dha tulwa po, omanga dhilwe odha kala po uule woomvula.

“Otaya ndjondjo kehe mpoka pu na oopomba dholusheno lwoketango. Ohaya kutha po oopomba nokuthiga po omayaha golusheno lwoketango. Ondiwete kutya iinima mbika oye na mpoka haye ke yi landitha ashike katu shi kutya ohayi landithwa peni,” osho a popi ngaaka.

Shikongo okwa popi kutya aafekelwa ye li yaali okwa li ya tulwa miipandeko momasiku 11 Septemba noya pewa nale egeelo.

Okwa popi kutya konima yaashoka, oopomba dha yooloka dhomeya dhi li heyali natango odha yakwa po.

Shikongo okwa popi kutya aakwashigwana yamwe, unene tuu mboka ye li molwaamba nopate ya Nkurenkuru-Rundu, ngashingeyi ohaya longitha omeya gwomomulonga gwaKavango.

“Mboka ye li momikunda dhomeni ohaya mono omeya okuza pomahala galwe, ashike oshiningwanima shika, sha ningwa pokati komasiku 11 no12 Septemba, otashi ulike kutya osha thiga aakwashigwana oyendji mompumbwe yomeya, molwashoka kapu na aashiinda mboka ye na omeya.”

Okwa popi kutya uuministili okwa li wu na okugandja omeya kaakwashigwana yomomikunda ndhoka dha gumwa, ashike oshitopolwa shoka shaKavango Uuninginino kashi na ootenga dhokutulwa omeya.

Shikongo okwa popi kutya uuministili otawu kambadhala okutala omikalo dhilwe ngaashi okutula po oopomba ndhoka hadhi longithwa kuushina wokolusheno opo aakwashigwana ya vule okumona omeya gokutula mootenga dhawo.

“Sigo oompaka opo tu mone ekandulopo lyomukundu tali kalele, oshi na okupula ethimbo ele, ashike otuli pokumana ekandulopo lyomukundu lyopakathimbo opo tu kwathele aakwashigwana. Oshiwike twa taalela [oshiwike shika] otatu kala twe shi ninga,” osho a popi ngaaka.

Sho a kwatathanwa naye, kansela gwoshikandjohogololo shaMpungu, Titus Kandjimi Shiudifonya, okwa koleke kutya oopomba dhomeya odha yakwa po moshikandjohogololo shawo.

Omukwatakanithi gwomakonakono giimbuluma moshitopolwa shaKavango Uuninginino, omupevikomufala Abner Agas oshiwike sha zi ko okwa popi kutya eyako lyoopomba dhomeya olya tameke muAuguste.

Okwa popi kutya omidhingoloko ndhoka dha gumwa ongaashi oshikandjohogololo shaKapako, moka mwa yakwa oopomba 14.

Oshiningwanima shilwe, sheyako lyoopomba dhomeya osha lopotwa mEtitatu lya zi ko.

Sigo oompaka, Agas okwa popi kutya aantu yaali oya tulwa miipandeko shi na sha neyako lyoopomba noya pewa egeelo lyoomvula mbali mongali sho ya monika ondjo yeyako lyomaliko gepangelo.

“Otashi uvitha nayi noonkondo. Onda hala owala okulondodha aakwashigwana ya tonatele omaliko ngoka,” osho a popi ngaaka.

Minista guunamapya nuuniimuna, Calle Schlettwein okwa tongonona eyako lyoopomba dhomeya ngoka ongoshimbuluma.

“Opolisi oya pumbwa okukutha ko oongaku,” osho minista a popi ngaaka okupitila kepandje lye kiikundaneki yopankalathano, komalungula.

Omukuluntu gwooprojeka dhomeya gokomikunda muuministili mboka, Elijah Ngurare, okwa popi kutya eyako lyoopomba dhomeya olya thiga omikunda 13 kaadhi na omeya.

“Oshu uvitha ndje nayi,” osho Ngurare a popi ngaaka okupitila kepandje lye lyoTwitter, kiikundaneki yopankalathano komalungula.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.