Ookwiimangela uundini ohashi kwathela: Shikesho

OMUKALIMO gwomOshitopolwa sha Shana, tate Ben Shikesho, oku na omaipulo omanene kombinga yaakwashigwana oyendji taya si omeya pethimbo ndika lyomeya ogendji mwa kwatelwa naangoka gefundja gi ihanena noNooli ayihe noge li taga dhipaga aantu hanga kehe esiku.

Tate Shikesho ota pula kutya osho ashike tashi yi ngeyi nenge oshigwana otashi ningi po sha shokwiikwathela?
Sigo oompaka, aakalimo ye vulithe the pethele oya sa nale omeya okuza sho omvula ya tameke okuloka mu Desemba 2008 sigo onena ndjika.
Shikesho ngoka ta ti okwa tokola okukwathela opo aakwashigwana ya kale itaya si we omeya unene, ota ti kutya oku na ontseyo yokweeta po ekwatho lyontumba ndjoka tali vulu okukala omaso gomomeya moshipala ngele aakwashigwana oya longele kumwe naye nenge yi utha kwaashoka ta eta po.
Shikesho, ngoka a kala omukwiita gwoSwapo kombanda pethimbo lyekondjelomanguluko, ta ti kutya oku na edhilaadhilo lyokweeta po omukalo ngoka ya li haya longitha manga ya li mOPLANA ya Namibia kombanda pethimbo lyekondjelomanguluko, sho ya kala taya taaguluka iishana yuudha omeya ya thinda komahala gomalugodhi.
Tate Shikesho ta ti kutya yo oya kala hayi imangele uundini/uumbaguushungasheyi nosho tuu woolitela ntano lwaampoka uuna taya taaguluka iishana yomeya nohashi yakwathele noonkondo mokutaaguluka omeya miishana moka.
Ta ti mboka kaye shi okuyoga ohaye wu mangelwa lwokontulo omanga mboka ye shi okuyoga haye wu mangelwa lwokoshiya, nohashi ya kwathele noonkondo lela mokutaaguluka iishana yomeya.
‘Oshinima shoka ohashi kwathele oshoka omuntu a mangelwa okambago hoka ngawo ke na okuningina nuupu kohi yomeya. Ondi wete kutya oshigwana shetu oshindji shomoNooli ya Namibia, unene mOshitopolwa sha Shana, sha Hangwena, sha Musati nosha Shikoto, kashi shi okuyoga nopwa pumbwa nee pu kongwe ondunge onene yokuhupitha oshigwana shetu shika komaso gomomeya, ngashi sha dhidhilikwa omvula ya zi ko na unene tuu ndjika yonuumvo, moka oyendji yomaakwashigwana ya kanitha oomwenyo dhawo omolu okusa omeya, ‘tate Shikesho ta ti ngawo.
Ta gwedha ko ta ti kutya ye okwiilongekidha okukwathela oshigwana moshinima shoka, omoli ontseyo e yi na nale, ngashi e shi popya metetekelo. ‘Otashi ka kala oshiwanawa nge Ookaansela dhetu tatu ningi ekwatathano nayo, opo tu tule oshinima shika miilonga, oshoka oshigwana shetu osha pumbwa okulongwa oshindji opo shi vule okwiihupitha miiponga mbika yaashi yopauntshitwe, ngashi omaso gomeya nosho tuu,’tate Shikesho ta ti ngawo.
Ta ti kutya ongodhi ye oyo 0812557386. ‘Yakwetu oshigwana shetu otashi si omeya, osha pumbwa ekwatho, na natu shi kwatheleni mpoka tatu vulu,’ Shikesho ta ti ngawo.