OMUKIINTU omugundjuka lela, e li mepipi lyomimvo omilongombali nasha, ota ti okwa lya iipyu niitalala mondjokana.
Okwa li e na ngeno okukala ti ilongekidhile onkalamwenyo ye niilonga yi li hwepo ngashingeyi, ihe omahepeko gomondjokana oge mu zazameka noge mu thiga pomutenya.
Omugundjuka nguka okwa hokanwa komulumentu ngoka ya kalele naye uule womimvo ne manga inaya dhika ondjokana, noya pewa omagano gaanona yatatu.
Petameko, ondjokana yawo oya li ya fa oparandisa, ngashi naana a li a tegelela.
‘Mupya ‘munene, omahepeko ogi iyakele mo mondjokana yawo konima sho a ningi omusimba netegelelo lyosheeli shawo.
Okwa kala ta monithwa iihuna.
Molwomahepeko, okanona kawo oka valwa ke na eho li na oshikogo shombinzi.
“Omahepeko oga thigila ndje iiyadhi moshipala nokomugongo.
Omusamane gwandje oha hepeke ndje wo pamadhiladhilo, ta tumine iinima tayi hepeke ndje koFacebook, unene kombinga yandje noyaakuluntu yandje, nosho wo kombinga yoluvalo lwetu.
Okwa kala ta monitha omadhiladhilo gandje iihuna ethimbo alihe lyondjokana yetu, ihe onda kala ngaa ndi itula mo, te ti pamwe ota lundulula, molwashoka ngame omwiitaali,” omukiintu nguka ta yelitha.
Ehepekathano okupitila miikundaneki yoohungi dhokointerneta oli li po tali vuka moNamibia.
Opolisi yaSouth Africa oya fatulula kutya opu na aantu taya hepekathana komapandja gopashinanena goohungi, ngashi koFacebook, WhatsApp nosho wo koTwitter, taya ponokelathana.
Omusamane gwomukiintu nguka omugundjuka oha hepeke nayi omukulukadhi gwe komapandja ngaka, te mu ula omalaka omadhigu noku mu sitha ohoni.
“Ota lundilile ndje uulodhi, nohi ipula wo kombinga yahe yoluvalo lwetu,”
Ayihe mbika otayi hepeke omadhiladhilo gandje.
Pethimbo ondjoka yawo ya li nawa, omukiintu nguka okwa li a zimine opo a kuthile omulumentu gwe omukuli, molwashoka oye ha longele epangelo noku na iilonga niiyemo tayi kalele.
Omukuli ngoka ngashingeyi ohagu nanwa kondjambi ye.
Nando omushungu okwa li u uvaneke oku mu shunithila oshimaliwa she, ina gwanitha po euvaneko lye.
Gwonale okwa tile okupopya hako iilonga.
Peha lyokugwanitha po omauvaneko ge, omusamane okwe ekelehi oshinakugwanithwa shokusila egumbo lye oshimpwiyu.
Okwa sitalafa omukulukadhi gwe nomutengi omudhigu gwokufuta omukuli gwe, molwashoka oku shi lela kutya oku na okuhupa nuudhigu pashimaliwa.
Omukulukadhi, molwompumbwe yoshimaliwa, ita vulu we okugwanitha po oompumbwe dhegumbo.
“Ondi li muudhigu.
Itandi gwanitha po we oompumbwe dhegumbo, mwa kwatelwa othitha yolukalwa moka handi zi. Ngashingeyi ohatu li ashike lumwe mesiku.
Aanona yandje yatatu oyo unene taya hupu shokadhila, unene ngoka omushona, molwashoka okwa pumbwa omahini.
Molwethindakano lyomadhiladhilo, omahini gandje oga hula,” omumvali ta hokolola.
Omathimbo gamwe oha kwatwa komadhiladhilo a shune mondjoka ye, te shi ningi molwompumbwe yoshimaliwa opo a hupithe oluvalo lwawo, ihe sho a dhiladhila onkalo yomahepeko nuuwehame, omutima gwe ohagu galuluka.
Ita vulu we okwiidhidhimikila uululu niihuna yondjokana, onkene ota kongo ekwatho.
“Onda gwililwa po unene.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
