Onakupila omagumbo ya mono ekwathelo

A
AKALIMO yamwe yomOshakatiuzilo sha kaansela Loth Kuushomwa, metitano lya zi ko oya pewa omakwatho kaasihenda okupitila mOmbelewa yOshikandjohogololo shawo sha Shakatiuzilo no ya pandula noonkondo kekwatho ndika, lya thikama unene momakumbatha, miizalomwa yoonguwo, oongaku nosho tuu.

Ehangano lya dhana onkandangala mokugandja omagano ngaka olyo ndyoka lyedhina Organization for Training and Support Care for Orphans and Vulnerable Children, ano Ehangano lyOshigwana li lile po okudheula noshowo okusila oshimpwiyu oothigwa naanona ya mona iihuna, ndyoka esiku ndyoka lya li lya kalelwapo kugumwe gwomaanambelewa aakuluntu yalyo moshitopolwa meme Sylvia Martin noshowo komulongisikola Samwel Shigwedha, ngoka pamwe nayakwawo haya kwathele noonkondo miinima ya pamba ookinde moshitopolwa. Omagano gatya ngeyi oga pewa nee oonakuganuninwa ku kaansela gwoshikandjo sha Shakatiuzilo, Loth Kuushomwa pombelewa yawo pOmege. Mokati koonakukala mpoka opwa li wo iilyo yOkomitiye yi na sha nOmapendulopo mOshikandjo shoka, ngaashi, Robert Frans na Karolina Shituntu Henock. Pethimbo ta gandja nee omagano ngaka, kaansela Kuushomwa okwa ti kutya moshikandjohogololo shawo sha Shakatiuzilo omu na aantu oyendji ya pila omagumbo, unene tuu mboka yomomagumbo giiti momikunda moka noshowo mboka yomuumbashu momalukanda. Ta ti unene tuu mboka kaye na iiyemo oyindji, oyo haya pile omagumbo nuumbashu wawo ethimbo alihe nohaya kala nee ya pumbwa ekwatho noonkondo, ndyoka olundji hali kala kali po nawa nenge kali li po ashike nande. Kuushomwa ota ti kutya oha kondjo ngaa nee kuye mwene a monene aantu ye mboka ya pila omagumbo, ekwatho okuza maasihenda, ngashi ya pewa ngeyi.Kuushomwa ta ti sigo oompaka mboka haya pile omagumbo kaya mona omakwatho okuzilila kElelo molwashoka hoka kaku na sha sho ku yakwathela, onkee ha yi ashike moonto dhaasihenda noku ya pulila ko omakwathelo.Kuushomwa ta indile kaanangeshefa, komahangano nokoohandimwe mOshikandjohogololo shawo nomoshitopolwa ashihe ya kwathele oonakumonithwa iihuna mbaka komililo.Kuushomwa ta ti kutya omukalimo gumwe mOneshila mOshakatiuzilo Lucia Lukas gwoomvula 29 okwa pila egumbo lye kumwe niinima ye ayihe mbyoka ya li mo kumwe noyaanegumbo lye thiluthilu na inaya hupa na sha.Na ye okwa pumbwa ekwatho okuza maakwashigwana.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.