Omvula otayi loko nawa mOnooli

OMVULA yi li nawa oyi li tayi loko mOnooli ya Namibia na okuniwe uumbanda kutya ngele oya tsikile ethimbo ele, otashi vulika yi ka eta efundja ndyoka lya li lya tula omagumbo noongeshefa odhindji kohi yomeya moondoolopa omumvo gwa zi ko. Ondoolopa ya Shakati oyo unene ya li ya dhengwa komeya gefundja, unene tuu omalukanda giipeleki ngoka ga tungwa pomahala inaga londa. Aantu oyendji oya li ya tembuthilwa komahala ngoka ga londa (ye li mootenda), konima sho omagumbo gawo ga yi momeya.

Ondoolopa ya Ndangwa nayo oya li wo ya dhengwa komeya gefundja omumvo gwa zi ko. Oshiwike sha zi ko, Omunambelewa gwa Muni gwa Ndangwa Martin Elago okwa li a lombwele oshitumikundaneki sha Nampa kutya Elelo lyondoolopa yawo olya longitha oshimaliwa sha konda poomiliona mbali, ya longithwa mokutunga oondama dhomeya nomokuthitulula omikanka dhokutondoka omeya opo omeye ga pite nawa ngele efundja olye ya ishewe.mOshakati, Muni gwa Shakati okwa kundukidha omalukanda ngoka ga shiga kiishana opo ga kelele omeya kage ye momalukaanda ngaka. Olaina yomavi ngaka oya za pontopa yopombumbu ya dhingoloka olukanda lwa Shikango yu uka kUupindi. Oshiwike sha zi ko, Omutseyinawa miikwameya mUuministeli wUunamapya, Omeya nOmakuti, Silvanus Uunona, okwa li a popi kutya nonande omvula onene oyi li tayi loko mOnooli nosho wo mwAangola lyUumbugantu, mOshana sha Kambembe naashoka sha Nalummono, inamu monika natango einyengo lyomeya gefundja.