Omupolisi a dhipaga ohondakadhona ye mOndangwa

OMUPOLISI ha longele mOtjiwarongo moshitopolwa shaTjozondjupa otaku hokololwa a yaha nokudhipaga ohondakadhona ye sha ningilwa mOndangwa.

Omupopiliko gwopolisi yaShana, Frieda Shikole, mOsoondaha, okwa lombwele onzokundaneki ndjika, kutya omulumentu gwedhina Onesmus Kalipi (41) okwa kutha ohondakadhona ye Selma Tangi Ruben, omwenyo, nolwanima okwi ikutha omwenyo sho i iyaha momutse nombistoli yoomilimeta 9.

Ruben omunambelewa gwopolisi yondholongo nokwa li ha longele kondholongo yaLuno moshitopolwa shaShana, noshiningwanima shoka otaku hokololwa dha ningwa mEtitano momudhingoloko gwaShinime Shiivula, mOndangwa.

Shikole okwa popi kutya Ruben okwa yahwa lwiikando itatu mepunda nokokwaako kokolulyo, nokwa li a falwa koshipangelo shaNandjokwe, ashike lwanima okwa hulitha ongulohi yEtitano ndyoka.

Inashi yela kutya oshike naanaa she etitha oshiningwanima shoka sheikuthomwenyo.

Nonande ongaaka hekulu gwaRuben, omusamane, Johannes Iipinge, okwa hokolola kutya Kalipi okwa li e mu dhengele omasiku ga piti noku mu tseyithila kutya ekwatathano lyawo lyopaihole naRuben ka lya li we monkalo ombwanawa oshoka kaya li we yuuvitathane.

Iipinge okwa gwedha po kutya Kalipi okwe mu lombwele wo kutya okwa li a futile Ruben osikola koshiputudhilo shopaungomba sho-Okakarara Vocational Training Centre, hoka a li ta sikola.

Konima sho Ruben a kutwa miilonga yuupolisi wondholongo, okwa tuminwa kOndangwa nokwa kala nee ha longele mondholongo yaLuno sigo opethimbo a hulitha.

Iipinge okwa hokolola kutya nonande Ruben naKalipi oya kala mekwatathano lyopaihole uule woomvula ntano, kali natango a tsakanena naKalipi. Oya kala owala haya kwatathano pangodhi nokuwete kutya Ruben oye a li a gandja onomola ye kuKalipi. “[Kalipi] Okwa lombwele ndje kutya okwa li a yi kegumbo lya tate kEpangu nokutseyithila aavali kombinga yekwatathano lyawo lyopaihole naTangi [Ruben], nokwe ya lombwele nokuli kutya okwe mu futila osikola,” osho Iipinge a popi ngaaka.

Okwa popi kutya Kalipi okwe mu lombwele wo kutya okwa li a tsakanene naRuben pethimbo a li netegelelo lyohondamati ye onkulu ndjoka ya li ye mu thigi po, nokonima yaashoka okwa kala naye mOtjiwarongo omanga e na etegelelo.

Iipinge okwa popi kutya Kalipi okwe mu lombwele kutya konima sho Ruben a mono okanona, okwa kala naye nokulela okanona pamwe ongokamwana. Okwa popi wo kutya okwa li a thaaneka nokwatokola okuhokana po Ruben, osho Iipinge a popi ngaaka.

“Sho nda pula [Ruben] kombinga yehokololo nda lombwelwa kuKalipi, kali nande a hala oku lombwela ndje sha. Okwa popi owala kutya okwa lopota Kalipi kopolisi osho wo kombelewa yuuthikepamwe, osho wo kutya Kalipi okwa li a lombwelwa koveta opo e mu kale kokule,” osho Ipinge a popi ngaaka.

“Kali nande a hala okupopya ko sha. Okwa popi owala kutya inatu kala we tatu pulakene omahokololo ngoka tatu lombwelwa kuKalipi,” osho a popi ngaaka.

Omuniilonga pamwe naRuben, ngoka a tindi edhina lye li tumbulwe moshifonkundaneki, okwa lombwele onzokundaneki ndjika kutya Ruben omuntu omunyanyukwi.

“Okwa li ha ningi omashendjo nakehe gumwe,” osho omuniilonga pamwe a popi ngaaka. Omuniilonga gwokoradio yoNBC Simon Mapeni Kondjashili, ngoka oye gumwe gomaapambele yaKalipi, mOlyomakaya okwa gandja omahekeleko kookuume nokezimo, okupitila kepandje lye lyokomalungula.

“Onda gwililwa po kezepo lyoye. Inda nombili ingatu tsakanene, kuume Hafeni Onesmus Kalipi. Kuume, ayihe kayi li we melandulathano huka, ongundu yaakongindjila yomOlupandu osho wo ezimo alihe lyaakongindjila moNamibia otali ka kala lye ku yuulukwa. Vululukwa nombili, mumati gwandje,” osho a shanga ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.