Ngoka li omuniilonga gwomombaanga yoStandard Bank, Mario Santos, ta tamanekelwa eyako lyoshimaliwa shoomiliyona N$1,7 mombaanga moka a li ha longo, ina mangululwa mo mongali natango sha landula sho a holoka mompangu yamangestrata gwaRundu, mEtine lya zi ko.
Santos (33) okwa ningi eindilo opo etokolo lyokutindilwa oboloha lya ningwa omvula ya zi ko, li talululwe.
Omufekelwa ngoka okwa li a holoka lwoshikando shotango komeho gamangestrata Sonia Samupofu, muKotoba omumvo gwa zi ko. Mangestrata ngoka okwa li e mu tindile oboloha omolwuunene woshipotha shoka a taalela, nokuniwe wo uumbanda kutya otashi vulika a kaye olunyala miilonga yomakonakono, ngele okwa mangululwa.
Oshipotha she okwa li shu undulilwa kuJanuali gwonumvo sho a holoka lwoshikando oshitiyali, ashike okwa li natango a tindilwa oboloha.
MuMaalitsa, Santos okwa tokola opo a tule mo eindilo lyokutalulula etokolo lyokutindilwa oboloha.
“Otwi ipyakidhila neindilo lyokutalulula ompinge yokupewa oboloha, ndyoka lya gandjwa muMaalitsa numvo, nuuna twa pyakudhukwa otatu ka gandja omatompelo getu,” osho hahende Samson Enkali gwehangano lyoohahende lyedhina Kadhila Amoomo Legal Practioners, a popi ngaaka.
Epangelo olya popi kutya olyi ipyakidhila natango nokuninga omakonakono, nonkene olya hala Santos a kalekwa mondholongo manga sigo omomasiku 18 Juli, sho ta ka holoka miihokolola ye mbyoka.
Santos okwa tulwa miipandeko momasiku 24 Kotoba omumvo gwa zi ko, mekwatathano neyako osho wo uukengeleledhi woshimaliwa.
Otaku hokololwa kutya Santos okwa li a kutha oshimaliwa komayalulo goombaanga dhookastoma, sha ningwa pokati kaAuguste 2021 nomasiku 31 Auguste omumvo gwa zi ko.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
