Omundohotola Veikko Munyika a ninga omumbiisofi gwoshikandjongeleki shUuninginino

OMUSITA omundohotola Veikko Munyika omvalele yomOhauwanga mOukwanyama moshitopolwa shaHangwena a valwa momumvo 1953, a ninga omumbiisofi gwoshikandjongeleki shUuninginino pehala lyomumbiisofi Josaphat Kashindi Shanghala ngoka a yi moshipundi shevululuko konima sho a lele oshikandjongeleki shoka shUuninginino okuza momumvo 2010 lwaampoka.

Omumbiisofi omupe Munyika okwa yapulilwa oshilonga she shika oshiyapuki komumbiisofi omuwiliki gwongeleki yaELCIN Omundohotola Shekutaamba VV Nambala, sha ningwa mOsoondaha ndjika ya zi ko megongalo lyaNgwediva ELCIN mOngwediva moshitopolwa shaShana. Oshituthiyapulo she osha li sha kalwa komukulukadhi gwe meme Lovisa Ndinelago Munyika nosho wo oyana aalumentu yatatu, iitenya naatekulu nosho wo nee aawiliki yopambepo, taya kwatelwa komeho komumbiisofi omuwiliki omundohotola Nambala nosho wo komumbiisofi tayi moshipundi shevululuko tate Josaphata Kashindi Shanghala nomukulukadhi gwe meme Aune Shanghala nosho wo nee maambiisofi ye li miipundi yevululuko, ngashi tatekulu omundohotola Kleopas Dumeni. Omukulukadhi gwe meekulu Aino Dumeni okwa adhika e li koshipangelo kOvenduka. Omumbiisofi Apollos Kaulinge nomukulukadhi gwe meekulu Elina Kaulinge, omumbiisofi Johannes Sindano nomukulukadhi gwe meekulu Nane Sindano, nosho wo omumbiisofi Tomas Shivute nomukulukadhi gwe Hilja Shivute, aambiisofi yoongeleki oomwayinathana ngaashi tatekulu Nathanael Nakwatumba, omumbiisofi Erick Hertel gwaDELK naUCC-NELC, omumbiisofi Tomas Ndawanapo gwongeleki ya Luteli moAngola, omumbiishofi Ernst //Gamxamub gwaaluteri moRepublika yaNamibia, Omumbiisofi Stephania Kameeta gwehangano lyAakwaluteri muuyuni, Amushangandjayi gwongongahangano yOongeleki moNamibia (CCN) mee Maria Kapere, amushangandjayi gwaELCIN omusita Alpo Enkono, aasita yomagongalo. Elelongeleki lyaELCIN nalyo olya li lya kalelwa po nawa lela. Aayenda ya simana yalwe yoshituthi ongashi unene omupresidende gwoshilongo tatekulu Hifikepunye Pohamba, oominista naapeviminista, aanambelewa aakuluntu yepangelo, oogavena yiitopolwa taya kwatelwa komeho kugavena yaShana tate Clemens Kashuupulwa , meya gwaNgwediva tate Jason Asino nayakwawo yalwe, ookaansela dhiitopolwa noondoolopa, aawiliki yopamuthigululwakalo ngashi, ohamba yUukwanyama meekulu Martha Mwadinomho Kristiaan Nelumbu, Omukwaniilwa gwUukwaluudhi tatekulu Josia Shikongo Taapopi nomunyekadhi gwe gwUukwaluudhi kuku Taapopi, omukwaniilwa gwaNgandjera tatekulu Johannes Mupiya nomunyekadhi gwaNgandjera kuku Mupiya, Elenga enene lyaMbalantu tatekulu Oswin Mukulu. Omukwaniilwa gwOndonga tatekulu Immanuel Kauluma Elifas nelenga enene lyUukwambi tatekulu Herman Iipumbu kaya li ya vula okuthika omolwomaimbo, osho wo elenga enene lyUukolonkadhi tatekulu Daniel Shooya nelenga enene lyaMbandja ano lyaKalongo tatekulu Mathias Walaula. Ashike pakuuva oya li ya tuma aakalelipo yawo, aanangeshefa, aanafaalama, iilyo yomagongalo gi ili nogi ili gaELCIN noyoongeleki oomwayinathana, aanangeshefa taya kwatelwa komeho komunashipundi gwehangano lyaanangeshefa mOnooli tate Thomas Koneka Iindji ngoka oye a li omunashipundi gwokangundulongekidhi koshituthiyapulo shika, aawiliki yi ili noyi ili yopashigwana, aagundjuka nosho wo aanona. Oshituthi shoka sha li she ende nawa lela, osha li sha wilikwa kumeme Anneli Mulamba nokomusita tate Julius Mtuleni. Osha li wo sha kalekwa nawa kooprotokolo dhootate Peipawa Shiyagaya nootate Peter Mutumbulwa, oomeme Loini (Kasikili) Hamunyela nooyakwawo oyendji.

Ooitaali ya za koombinga noombinga dhoshilongo oya li ya gongala nawa nokupulakena nokutala shoka tashi ningwa po. Konima yeyapulo lyombiisofi Munyika okwa landula nee elongelokalunga ndyoka lya li lya kwatelwa komeho komusita Elia Ndishishi nomusita Likius Namutewa. Omuuvithi okwa li omuyapulwambiisofi ye mwene omundohotola Veikko Munyika ngoka i indile ombili, uukumwe nesinamenekathano yi pangele mokati kooitaali moNamibia nokukambadhala yu ukithe onkalo yaNamibia, ndjoka yi li po tayi piyagana, mondjila yoshili, yombili netungopo lyoshilongo paendondo dhi ili nodhi ili.

Oshigongi oshinene shaELCIN shoka sha li ko okuza 25 sigo 29 Novomba omvula ya zi ko, osho sha hogolola omusita Munyika a ninge omumbiisofi omutitatu nenge omutine lwaampoka gwoshikandjongeleki shUuninginino, a landule omumbiisofi Shanghala ngoka ta yi moshipundi shevululuko. Elelongeleki lyaELCIN tali tokola nee kutya omusita Munyika a kale a yapulilwa oshilonga she shuudiakoni meti 23 Febuluali 2014 komumbiisofi omuwiliki Shekutaamba Nambala, ngashi nee sha ningwa ngawo mOsoondaha ya zi ko.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.