Omunangeshefa omushona gwomOngwediva a hulitha

OMUNANGESHEFA omushona gwomOngwediva moshitopolwa sha Shana meme Josefina Hiskia Hauwanga, okwa manene oondjenda dhe mOshipangelo shEpangelo sha Katutura mOvenduka meti 18 Juli 2009 konima yuuwehame nomepipi lyomimvo 47.

Nakusa meme Joseffina omumwamemekadhona gwOmusita a tseyika nawa gwOngeleka ya Anglicana, Rev, Canon Nangula Kathindi, ngoka wo e tu pe etumwalaka ndika lyoluhodhi. Rev. Canon Kathindi, ota ti kutya, nakusa Josefina ota fumvikwa ngula mOlyomakaya mOmawendo ga Muni gwa Ngwediva mOngwediva okuzilila pegumbo lyawo lya meme Feni Simon Kataula mOngwediva, moka omo tamu ningilwa Elongelokalunga lyOshituthifumviko she, molwashoka etungo lyOngeleka ya Anglican mOshakati, oli li metifa lyokutungwa.Tashi tameke pethimbo lyongula lela pohetatu yongula lwaampoka. Oshituthidhimbuluko sha nakusa meme Josefina, meme Kathindi ota ti kutya nasho otashi ningilwa pegumbo lya meme Feni Simon Kataula mOngwediva moka komatango gonena okuza potundi ontintano (17H00) yokomatango.Nakusa Josefina, ngoka a kala omunyangadhali niioindi kuye mwene, okwa thiga ko aanona ye aamati yatatu. Ngoka wa hala okumona uuyelele wiihwapo oto vulu okudhengela Rev Canon Kathindi kongodhi ye ndjika, 0811474334. Oshifo shetu otashi gandja omahekeleko koonakuthigwapo atuheni.