Pauyelele wolopota yopolisi ndjoka ya pitithwa uunambo, mehuliloshiwike lya piti omwa lopotwa omaimangeleko gatatu mwa kwatelwa omukulupe gwomimvo 86, ngoka a adhika i imangelekela mepya lyegumbo lye, ongula yEtitano, momukunda Oshaandja mOshakati shokUuninginino.
Pauyelele wolopota yopolisi, omudhimba gwa kuku Fredrick Shikodhi ogwi itsuwika komwanamati gwe endjelela momuti gu li mepya.
Kuku Shikodhi okwa li a monika lwa hugunina ongulohi yEtine, ishewe ina thiga ko ombapila ndjoka tayi yelitha eikutho lye lyomwenyo.
Kapu na ngoka ta pelwombedhi eso lye nomakonakono gopolisi otaga tsikile.
Omaimangeleko galwe ngoka ga lopotwa omwa kwatelwa omukiintu gwomimvo 51 ngoka i imangeleke molukanda lwaMahenene mOshakati, mEtitano.
Moshitopolwa shaMusati omwa lopotwa Immanuel Sheehama Matias (33), ngoka taku fekelwa kutya naye okwi imangeleke mEtitano, momukunda Okathitu KaNangombe.
Moshiningwanima sha yooloka, otaku hokololwa omudhimba gwohanona gwi itsuwika mendoloma lyiiyaga momudhingoloko gwaWindhoek North, mOvenduka.
Pauyelele wopolisi otaku fekelwa kutya omukiintu gwontumba okwi ikutha etegelelo nokwe ekelahi omudhimba mendoloma.
Opolisi oya popi kutya omudhimba ngoka ogwi itsuwika komukwashigwana ngoka kwa li ta kongo oondooha mendoloma lyiiyagaya ongula yOsoondaha.
Kapu na ngoka a tulwa miipandeko sigo oompaka, omakonakono gopolisi otaga pula komeho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
