Omukuluntuwiliki gwaNiipa a kuthwa miilonga pakathimbo

MAYOLA gwondolopa yaNiipa, David Kambonde, mEtiyali okwa koleke koThe Namibian kutya omukuluntuwiliki gwondolopa yawo, Junias Jakob, okwa kuthwa miilonga pakathimbo ashike ina gandja uuyelele wetompelo lyaa shoka she eta a kuthwe miilonga.

Jakob okwa popi kutya omunashipundi gwokomitiye yelelo lyondolopa, Jafet Augustus, okwa kala e na olunyala miinyangadhalwa ya pamba omakuto gaaniilonga osho wo elando nenge efuto lyiipumbiwa nomayakulo gondolopa ndjoka.

Okupitila momukanda ngoka a pititha sha landula sho a kuthwa miilonga, Jakob okwa popi kutya ye, opamwe naaniilonga yamwe aakuluntu melelo lyondolopa ohaya kala taya mono iihuna lyokatongo kopaukwamuhoko mondolopa ndjoka.

Jakob okwa popi kutya opwa oshigongi melelo lyondolopa moka Augustus e mu lombwele opamwe naaniilonga yalwe kaaku landulwe omilandu ndhoka dhi li po dhokutotha mo nokukuta aaniilonga melelo lyondolopa.

Omukuluntuwiliki gwondolopa okwa popi kutya Augustus okwa tokola shoka osho shi ningwe nonande pamilandu dhekuto, onkatu nenge opoosa ndjoka ya holoka melelo lyondolopa oyi na tango okupitithwa meni ku gandjwe ompito kaaniilonga yelelo lyondolopa ngele opu na ngoka e na ohokwe nokwa adha iipumbiwa yopoosa ndjoka.

Nuuna nee kaapu na ngoka ha longele melelo lyondolopa a adha iipumbiwa yonkatu ndjoka, opo nee taku ningwa etokolo yi pitithwe moshigwana.

“Moshigongi osho tuu shoka, oya lombwelwa natango kutya omukuluntuwiliki osho wo aaniilonga yamwe kayeshi nande yomOniipa, yo ishewe kayeshi Aandonga, onkene kaye na okukala ye li melelo lyondolopa yaNiipa,” osho a popi ngaaka.

Jakob okwa popi kutya okuwete pu na etompelo lyopapolitika ndyoka lya thiminike a kuthwe miilonga pakathimbo molwaashoka okwa kala olundji ta tindi okupitika iihauto yelelo lyondoolopa yi ka longithwe piigongi yoSwapo.

Okwa popi kutya shoka oshe etitha ookansela melelo ye mu lopote kelelo lyongundu yoSwapo moshitopolwa shaShikoto.

Jakob natango okwa popi kutya nonande Augustus okuli gumwe gomookansela yelelo lyondolopa yaNiipa, kashi li paveta molwashoka keshi omukalimo gomOniipa, oshoka ohazi mOndangwa.

“Melelo lyondolopa yaNiipa okuli mo shaa li paveta molwashoka mOniipa oku na mo ashike ondingosho. Onkatu ndjoka yuukasnela okwa li pitithwa omolwoshilonga shoka shaa li paveta ashike osha tindwa,” osho a popi ngaaka.

Jakob okwa popi kutya okwa tseyithilwa kutya Augustus okwa ninga nale oompangela dhopaholamo opo okontalaka yiilonga ye [yaJakob] kaayi lelepekwe molwashoka “okwa mona nale omuntu ngoka te mu pingene po”.

Jakob okwa gwedha popi tati, Augustus okwa popi kutya okontalaka yiilonga yuukuluntuwiliki “okwa li ya lelepekwa shaa li pakotampango”.

Uunambo, Augustus okwa ningi oshigongi namayola gwaNiipa, omupevimayola osho wo ookansela yalwe yatatu opo Jakob a kuthwe miilonga.

Augustus okwa lombwele oThe Namibian kutya okwa li moshigongi noka li nande ta vulu okuyamukula ko sha koshikumungu shoka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.