Omukiintu i imangeleke moHavana

Otaku hokololwa kutya nakusa Hilda Hamanyala okwa li a hupu lwiikando ine moongodhi sho a kala ta kambadhala okwiikutha omwenyo.

Omusamane gwe, Efraim Hamanyala okwa hokolola kutya omukulukadhi gwe okwa kala aluhe ha kambadhala okwi ikutha omwenyo, unene tuu shampa a nu omalovu.

“Inatu ninga onkambadhala yokukonga ekwatho molwashoka aluhe konima yonkambadhala yokwiidhipaga ohetu uvaneke kutya ite shi ningi we. Aluhe oha kambadhala okwiikutha omwenyo uuna e li kohi yondhungo, nuuna a penduka esiku lya landula oha kala a kumwa uuna twe mu lombwele kutya ongulohi ya piti okwa li ta kambadhala okwiikutha omwenyo,” osho Hamanyala a popi ngaaka.

Okwa popi kutya omukulukadhi gwe ngoka okwa li ehole omashendjo noonkondo.

Omupopiliko gwopolisi yoshitopolwa shaKhomas, Silas Shipandeni okwa popi kutya Hilda okwa li a kambadhala okwi ikutha omwenyo lwiikando iyali mo2021, ashike omwanamati Sadrag Luwaya okwe mu kutha mo moombale.

“Mo2022, okwa li natango a ningi onkambadhala yokwiimangeleka natango lwaali, ashike omwana okwe mu kutha mo natango naashoka oshe eta a kale a yugwa moombale lwiikando ine, ashike omupya omunene ogwa holoka sho a ningi onkambadhala ontitano noye mu faalele,” osho Shipandeni a popi ngaaka.

Onzonkundaneki ndjika inayi vula okumona Luwaya opo a tye ko sha, ashike oya popi nomwanakadhona gwaHilda, Tuli Haufiku ngoka a popi kutya eso lya meme gwe olye ya halutha.

“Okwa lombwele ndje kutya okwa hala okwi ikutha omwenyo. Onde mu pula kutya omolwashike a hala okuninga oshinima shi li ngaaka, nokwa yamukula ndje kutya omolwaashoka aavali ye ayehe oya hula ko nale, noku na wo omaupyakadhi ogendji. Onde mu lombwele kutya ini ikutha omwenyo, molwashoka tse, ongoyana osho wo aatekulu ye, otwe mu pumbwa. Nokwazimine kutya ite shi ningi we,” osho Haufiku a hokolola ngaaka.

Uuyelele womayalulo moshilongo owu ulike kutya okuza muJanuali 2021 sigo omuJuli 2022 aantu ye li 790 oya ndhindhilikwa ya mana oondjenda sho yi ikutha oomwenyo yoyene.

Momwaalu ngoka, ye li 649 aalumentu, ye li 102 aakiintu omanga ye li 39 aanona.

Momwaalu ngoka, oonakusa ye li 124 yomoshitopolwa shaMusati, moka ye li 99 aalumentu omanga ye li 19 aakiintu, naanona ye li yahamano.

Omupeviminista guundjolowele nonkalonawa Esther Muinjangue okwa popi kutya omiyalu dhi li pombanda dhaantu taya ikutha oomwenyo, otadhi eta eikwato pomutima.

Okwi indile oshigwana kaashi kanithe omukumo.

“Otandi indile nokutsa omukumo tukale aagandji yomukumo momidhingoloko dhetu nokwi itsa omukumo tseyene, aakwanezimo yetu, ookuume ketu osho wo aaniilonga pamwe natse opo ya konge omakwatho. Ondi inekela kutya ngele ongoshigwana otwa longele kumwe okwe eta po omukumo ngoka nena otashi ka kwathela mokuyanda omaikuthomwenyo,” osho a popi ngaaka.

Muinjangue okwiindile wo aantu kaaya kale we nande ya sa ohoni okupopya uuna taya piyaganekwa pamadhiladhilo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.