Omufekelwa ta galikana koFacebook

OMUKWIITA metanga lyegameno lyaNamibia, ngoka ta fekelelwa edhipago lyohonda ye nondjembo moshilandopangelo mOsoondaha, okwa holokele mompangu yamangestrata moKatutura uunambo, noshipotha she otashi ka pulakenwa mu5 Maalitsa nuumvo.

Owili yimwe manga omunamimvo 39 Johannes Neuaka ina dhipagela Shane Rittmann pegumbo lyayina (yaRittmann) moKatutura nondjembo, okwa shanga kepandje lye koFacebook ta ti: “Oh! Kalunga kandje kwatha ndje, inandi hala ndi shi ninge.”

Konima sho a yaha Rittmann okusa, Neuaka otaku hokololwa a yi mohauto e ta yi ontuku, ihe okwa ki igandja lwanima esiku ndyoka komiya dhashinana posasiona yaKatutura.

Neuaka, omukwiita metanga lyegameno ha longele mokamba yokoSona popepi nOkahandja, okwa tulwa miityaka pethimbo i ifala kopolisi.

Omutamaneki Victoria Thomson ina popila ombooloha yaNeuaka, molwashoka oshipotha she oshinene, go omakonakono oge li petameko lela.

Okwa ti oya tila pamwe Neuaka ota nwetha mo mboka ya mona iilonga ye, ta gwedha po kutya oshi li muuwanawa woshigwana, notaku longwa wo pauyuuki ngele Neuaka okwa kalekwa mondjedhililo.

Neuaka okwa li a kalelwa po komunongolaamata Vetu Uanivi.

Otaku hokololwa kutya Rittmann okwa yahwa momutse nombistoli yoMakarov, ihe kaku shiwike kutya omolwashike.

Nando ongaaka otwa nothelwa ko kutya ekwatathano lyaaniihole mbaka yaali – nakusa nomufekelwa – olya li lya nika iipa yombwa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.