Omufekelwa gomadhipago shinyanyaleka ta ka konaakonwa pamadhilaadhilo

NGOKA ta fekelwa edhipago lyaapambele ye yatatu Sam Nauyoma Petrus, okwa li a pewa elombwelo lyoku ka konaakonwa gopamadhilaadhilo opo ku monike ngele oku li ngaa pankatu yopamadhilaadhilo ge li nawa okuholoka miihokolola kombinga yiipotha ta tamanekelwa.

Petrus (26) otaku hokololwa a li a tetagula nokudhipaga yina, Vilgenia Teofelus (61), mumwayinamati Simon Petrus (30), omutekulu Ndapandula Ndahalaovanhu Hafeni (1) nomutekulu gwe gumwe ngoka naye a li e mu tetagula okwa li a hupu.

Aanona yalwe yaali – gumwe oku na omimvo omugoyi omanga omukwawo oku na heyali – oya li ye shi pondola okufadhukapo noya li ya ka holama puushiinda, Petrus otaku hokololwa a li a tsikile, noku ya koshigunda hoka a li a tetagula nokudhipaga iikombo iheyali nokambwa, oshiningwanima shoka tashi zitha omahwilili osha ningilwe momasiku sho ga li 5 gaNovemba 2019 megumbo lyaandjawo momukunda Epatululo moshikandjohogololo shaKatope, moshitopolwa shaHangwena.

Nakuningwa oshihakanwa omutine – ngoka woo e li omutekulu gwaPetrus e na omimvo mbali – okwa li a hupu ashike okwa li a monithwa oshiponga, nongashingeyi oku li moshipangelo shaShakati ta mono uuhaku. Notaku hokololwa kutya onkalo ye otayi nuwa omeya.

Okugulu kwe ko kolumoho osho wo ominwe dhe mbali dhokonyala yokolumoho odha li dha tetwa ko pethimbo lyoshiponokela.

Omutamaneki gwepangelo Sackey Mupuma okwa li a lombwele ondunda yompangu ndjoka ya li yu udha kaa ku na we mOmaandaha kutya Petrus okwa li a tuminwa koshipangelo shEngela mEtine lyoshiwike sha zi ko, konima sho a li itaa yamukula sha ye okwa li ta monika a fa a ngwangwana pethimbo a li a holoka lwotango mompangu oshiwike sha zi ko. MOmaandaha goshiwike shika sho a holoka mompangu natango, Petrus okwa li a ngungumana, ashike natango ka li ta yamukula komapulo ngoka a li a pulwa kumangestrata Elvis Mwilima.

Mwilima okwa li a yelithile Petrus kombinga yuuthemba wehogololo lye wokukalelwa po paveta okupitila muhahende gwehogololo lye ano gwopaumwene, nenge a ninge eindilo lyoohahende dhepangelo okupitila koshikondo shomakwatho goohahende muuninistili wUuyuuki, ye ishewe ota vulu okwi ikalela po ye mwene.

Petrus ina yamukula nenge a gandje kutya ota hogolola shike ngele otashi ya pakukalelwa po paveta. Olopota yopaundjolowele ndjoka ya li ya gandjwa kompangu kuMupuma oya ti Petrus oku li nawa palutu, ashike ndohotola ngoka a li e mu konaakona okwa li a gandja elombwelo opo a falwe komakonaako gopamadhilaadhilo.

Naashoka osha li she eta opo mangestrata Mwilima a gandje elombwelo lyomompangu opo Petrus a ka konaakonwe pamadhilaadhilo.

“Ota monika a fa inaa landula iihokolola molwashoka ita yamukula omapulo [ta pulwa], nokonima nokuli sho a li a yelithilwa uuthemba we [wokukalelwa po paveta],” osho a popi ngaaka.

Mupuma okwa li a tindi a mana mo kutya ommufekelwa ina pumbwa okupewa obooloha molwolwuunene woshipotha she, ishewe kashi li muuwanawa woshigwana, noshikwawo omufekelwa otashi vulika e ki idhope momakonaakono gopolisi osho wo oombangi dhepangelo.

Petrus okwa li a patululilwa iipotha itatu yomadhipago, oshipotha shonkambadhala yedhipago, oshipotha shelalakano lyeyonagulo lwiikando ihetatu sho a li a tete nokudhipaga yina, mumwayinamati, okatekulu komumvo gumwe, iikombo iheyali osho wo okambwa nekatana lwopo-06h00 mEtiyali lyoshiwike sha zi ko momukunda Epatululo.

Petrus okwa li a dhitikwa momukunda gopuushiinda konima yoowili oonshona sho a li a longo oshiningwanima shoka shinyanyaleka.

Oshipotha she oshu undulilwa komasiku 30 gaJanuali, nota kala mondjeedhililo natango.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.