Omolwashike Ondangwa itayi yi kOnethindi nOnandjokwe?

Pitika ndje ndi tye sha koshikumungu shOndoolopa ya Ndangwa. Tango nandi uve uukwawo wa Nankali (ohenda) pamwe naakalimo yomOndangwa mboka ye li monkalo ya nyayika, unene tuu sho omagumbo gawo ga li gu udhililwa komeya ngoka taku ti oge etithwa komvula ndjoka yali oyindji noonkondo, nomolwa wo omukalo gwetendo nethaneko lyomatungo mondoolopa moka.

Ondoolopa oyo ya li Olukalwa lwEpangelo lyOwambo pethimbo lyEpangelo lyOkatongo.Oya li ondoolopa ombwanawalela yi li molugumbo yo yi na omiti dha ziza, uupale wokudhanena, uundama wokuyoga negameno lya nuka po. Mbela oshike she etitha oondolopa yi kale tayi monika nayi ngawo? Oyo ngaa yu udha iiyagaya, oyo yi na oolamba itaadhi tema, oyo yi na oongeshefa tadhi shuna pevi nomatungo taga ulike ga kulupa nayi.Oku za pemanguluko otwa uvathana opo iinima tu ke yi endithe nawa shaashi otatu ipangele tse yene. Ashike, shi tashi monika mOndangwa osho ohoni nomandhilandhiliko taga ulike kutya nani otwa fa itaatu vulu okwiiwilika tse yene.Onda li nda haluka noonkondo sho nda lesha moshifo sho The Namibian, Juli 3, 2009, sho mwa lopotwa onkundana tayi ti: ‘Onethindi nOnandjokwe nayi ye kOndangwa: Amwele ta ti.’ Endjandjukununo lyehololo ndika olya lopota kutya Omunashipundi gwOshitayi shEhangano lyAanangashefa sha Ndangwa tate Paavo Amwele nedhina lya tseyika nawa Gondema mwene gwoongeshefa dhedhina Cansas City, okwa lombwele iikundaneki pOndangwa kutya aanangeshefa oya eta edhiladhilo netokolo kutya oshitipolwa shoka sha Nethindi nOnandjokwe, yi kale ya talika ko pambelewa ongIitopolwa yondoolopa ya Ndangwa opo aanangeshefa yomiitopolwa mbyoka iyali ya kale taya tyapula omauwanawana ga fa ngoka taga tyapulwa kaanangeshefa yomOndangwa.Omusamane Amwele ta tsikile ko tati, ‘onkee ano tse otu na etagameno ewanawa lele nolya kola kutya oongamba dhondoolopa ya Ndangwa tadhi ka tamununwe mo ndele tadhi ka kwatela mo Onethindi nOnandjokwe opo aanangeshefa yetu mboka ye li miitopolwa mbyoka ya kale taya mono nayo omauwanawa ngashi aanangeshefa yakwawo mboka ye li moondolopa dha lukwa moshilongo.’ Nonando ndi uvute uukwawo wanankali naangeshefa taya mono iihuna momudhiingoloki ngwOniipa, onda yematekwa kethaneko lyaanangeshefa yaNdangwa. Peha lyokuthaneka Ondangwa yi ze ko koshitopolwa sha shana, yi ye kOshikoto, otaya hutha ishewe Oshikoto iitopolwa mbyoka ya hupa po ye yi tutile kOshana. Ondangwa olyo ehala lyoombelewa dhelelo lya Ndonga, Aandonga oye li mOshikoto, ashike elelo lyawo oli li kOshana. Omolwashike shi na okukala ngaaka?Aanangeshefa mOndangwa ngele oye na uukwawo wa Nankali nayakwawo kOnethindi nOnandjokwe, oshike itaaya pula Ondangwa yi ze ko kOshana yo yi ithikamene po mOshikoto? Olye mbela eli konima yomalalakano ngano? Osha konekiwa nale kutya oombelewa odhindji odha tembudhilwa kOngwediva nOshakati nomatompelo inaaga yela. Aanambelewa yamwe mEwiliko lya Ndangwa oye na oohauto dhi na oonomola dha Ngwediva na Shakati. Onkene omukalo gwokwinyokoma papolotika itagu longo. Natu tungeni ashike oshilongo ashihe ngele otatu vulu shili. Onkene ano, Ondangwa nayi galukile kOshikoto, mOndonga, opo Aandonga tu kale nElelo lyetu lyopamuthigululwakalo li li pamwe natse. Omukalo gwokuukitha iinima ayihe kuuninginino wOwambo itashi longo kaya!Tangi uneneOmukalimo gwa NethindiOndonga