Omboma yomOmbaanga mOshakati ya dhimbulukiwa

ONGUNDU onene yoonakuhupa mEtopo lyOmboma mOmbaanga ya Barclays, ngashiingeyi yOtango yOpashigwana (First National Bank (FNB) noshowo aakwanezimo yoonakusila mEtopo ndyoka kumwe noothigwa dhaamboka ya sila mo, aaniilonga mOmbanga yoOtango yOpashigwana noshowo ookuume, mEtitano lya zi ko, oya li ya gongala pehala mpoka pwa topele omboma ndjika oomvula [22]ano meti 19 Februari 1988 nokudhimbulukwa oshiningwanima shesiku ndyoka noshowo okudhimbulukwa mboka ya sila mo noku ya halela evululuko lyaaluhe.

Oshituthi shokudhimbulukwa esiku ndyoka shomEtitano lya zi ko, sha wilikilwe kOmuwiliki gwOshitopolwa shimwe shOmbaanga yOtango yOpashigwana mOshakati tate Tomas Koneka Iindji nokweegululwa nEgalikno kOmusita Kleopas Nakale, osha li sha popithwa kOministeli yUuyuki me Pendukeni Iivula-Ithana noshowo ku Kaansela gwOshikandjohogololo sha Shakatiuzilo tate Loth Kuushomwa ngoka a popi pehala lya Gavena gwa Shana tate Klemens Kashuupulwa noshowo kOmukuluntu gwOpashitopolwa gwOmbaanga yOtango yOpashigwana tate Joseph Shivute.Omboma ndjoka oya faalela oomwenyo dhaantu ye li lwopomilongondatu noyendji ya lemana. Oyendji yomoonakusa aapangi naaniilonga mOshipangelo shEpangelo sha Shakati noshowo nee oonakulonga mOmbaanga ndjoka nookastoma ndhoka dhe yile mOmbaanga ndjoka esiku ndyoka.’ Otwe ya mpaka nena okudhimbulukwa aamwameme mboka ya sila mOmboma ndjika oomvula omilongombali nambali dha pita po. Osha pumbiwa tse oonakuhupa ko tu dhimbulukwe iilonga yuukolokoshi mbika yOmunakatongotongo omukolonyeki notu gandje uukwawowanakali koonakuthigwapo,’ Me Iivula-Ithana ta ti ngawo nokugwedha ko ta ti kutya Emanguluko lya Namibia inali za pokapala kayela, olya kanena oomwenyo dhaamati naakadhona ya Namibia opo kehe gumwe a kale ta tyapula emanguluko moka tu li nena. Onkee ano, Minista ta ti oohailwa mboka ye tu sile ni omolu emanguluko lyoshilongo shetu, natseni, tu kaleni twe ya simaneka ngashi tatu ya simaneke ngeyi moku ya dhimbulukwa.Minista ta ti oomboma dholudhi nduka, inadhi topa ashike mOshakati, ihe nomomahala wo galwe moshilongo noshowo miilongo yomuushiinda moka mwa kala oontauki dha Namibia pethimbo lyekondjelomanguluko. Ta ti oshilongo osha manguluka, Omukolonyeki ke po we, onkee nee Aanamibia oye na okwiikwatela ko yoyene ya kaleke po ombili, egameno nengungumano noshowo nee ya ye komeho nehumithokomeho lyoshilongo shawo Namibia lya manguluka. Taya humitha komeho paeprograma ndhoka dha tulwa po kEpangelo ngashi NDP3 nelalakano lyokukathika komumvo 2030 tu na Namibia noshigwana she ya putuka ngaashi iilongo iikwawo muuyuni ya putuka.Minista ta pandula Ombaanga yOtango yOpashigwana sho kehe omvula tayi longekidha oshituthi shokudhimbulukwa oonakusila mOmboma ndjika ya Shakati yOtango yOpashigwana meti 19 Februari 1988 noshowo ooluhupe noothigwa dhoonakusila mo. Ta pandula wo Ombaanga ndjika sho ya dhika emanya mpoka pwa topele omboma ndjika nokushanga ko omadhina goonakudhipagwa kOmboma ndjika. Kaansela Kuushomwa, ngoka a popi pehala lya Gavena Kashuupulwa, okwa ti emanguluko lya Namibia olye ya po nuudhigu.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.