Ehangano ledina Paratus Namibia ola ti omauyelele ovayakulwa opaumwene oku li meameno konima eshi omauyelele ehagano kwa li e li vakelwa oshivike sha dja ko.
Ehangano oshivike sha dja ko okwa li la lopota omauyelele oo e li vakelwa pamalungula.
Ehangano eli etivali lomauyelele tali ningilwa oshinima eshi konima ehangano loTelcom Namibia (TN) kwa li la ponokelwa pamalungula nomauyelele alo okwa li e livakelwa, osho kwa li sha nyana omauyelele opaumwene Ovanamibia ve dulife po600 000, mwa kwatelwa ovanambelewa vakula vepangelo neeministeli depangelo, muDesemba odula ya dja ko.
Omauyelele aParatus okwa li a ponokelwa okupitila pamalungula kuArika, ongudu yeengangala yopamalungula i shiivike nawa yopaunyuni oyo ye uwile muMarsa momudo 2023.
Eponokelo eli ole ya ashike konima yeemwedi mbali eshi Telcom kwa li e livakelwa nomauyelele akwao okwa li vali a danenwa koStandard Bank.
Omukulunhuwiliki woParatus Andrew Hall okwa ti nande okwa li pu na eponokelo, omauyelele ovayakulwa oo a tuvikilwa mehangano natango okwaamenwa, noitaa dulu nande okumonika kovanhu vokondje yehangano.
“Ombili ohatu shiivifa kutya otwa ninga oshihakanwa shovanhu ovo va nyika oshiponga tava ningi oinima ei va mone omauwa avo vene. Ashike, ohatu kufa onghatu ya kola i li ominge noshimbuluma eshi notu na elineekelo ohatu ka yandja ouyelele wa yela kovakufimbinga vetu kombinga yonghalo ei,” Osho a ti ngaho.
Momukanda oo kwa li wa yandjwa onguloshi yEtitatu, Paratus okwa ti eponokelo ola piyaaneka eesystema davo dimwe domauyelele, osho sha piyaaneka oilonga.
“Ehangano ola hala okulondoda ovakufimbinga valo kutya ola mona oinima inai pitikwa mosystema yalo yopaungoba yomauyelele omeni notali longo mo paife eponokelo lopamalungula olo,” Omukanda osho wa ti ngaho.
Ehangano otali ti otali twikile omakonakono opo li mone kutya oshike naana sha kumwa keponokelo eli.
“Ongudu ei aishe kumwe oya kala nokulonga puhe na olufuwo opo li i wapaleke eesystema odo da kumwa opo di dule okwaalukila momhepo,” Paratus osho a ti ngaho.
Ehangano lokuwilika omakwatafano laNamibia ledina Communications Regulatory Authority of Namibia (Cran) okupitila mehangano loNamibia Cyber Security Incident Response Team (Nam-CSIRT), ola tameka okuninga omakonaakono alo mwene kombinga yoshiningwanima eshi.
“Nam-CSRIT ota koleke oshiningwanima sheponokelo lopamalungula osho sha kuma Paratus Namibia Holdings. Pakutala kutya oshinima eshi osha nyika oshiponga ngahelipi, Nam-CSIRT okwa tameka omakonakono aye opaumwene. Ehangano eli otali ka yandja ouyelele wa pumbiwa diva,” Omupopiliko woCran Mufaro Nesongano osho a ti ngaho.
Ngoloneya woBank of Namibia Johannes !Gawaxab pefimbo leenghundafana dovakulunhuwiliki okwa ti napa kale pu na omilandu da kola dokukelela omaupyakadi omaponokelo opamalungula oo taa lundalala omanga taku kwashilipalekwa kutya moshikondo shoshimaliwa otamu longifwa omalungula opamufika.
“Omilandu da fimana dokuwilika oshimaliwa sha ngungumana inadi lunduluka. Ashike nee, natu kwashilipaleke yoo kutya osystema yoshimaliwa otai longo ongomutwe weyopombada lomaxupilo pakweendelelifa okuyandja omikuli nokulongifa oshimaliwa tu mone oiyemo,” !Gawaxab osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
