Omaulikilo gIikwaipindi ga Ngwediva omu Auguste

OMAULIKILO gIikwaipindi ga Ngwediva nuumvo otaga ka kala ko okuza meti: 21 Auguste 2009 sigo ometi 29 Auguste 2009 nokwa tegelelwa taku kala aauliki yiipindi ye vulithe pomathele gatano lwaampoka.

Meya gwondoolopa ya Ngwediva omusamane Erastus Uutoni, okwa lombwela The Namibian kutya etseyitho pambelewa kutya Omaulikilo gIikwaipindi ngaka otaga kaka kala ko omasiku ga tumbulwa metetekelo, olya ningilwe pambelewa ongulohi yOlyomakaya ga zi ko pethimbo lyIitendele ya li ya longekidhwa kElelo lyOodoolopa ya Ngwediva nokomitiye ndjoka tayi longekidha Omaulikilo gIikwaipindi ngaka. Pethimbo lyiitendele mbyoka, aanangeshefa, omahangano naantu koohandimwe oya umbile oshima,liwa shokukakwathela momaulikilo ngoka, shoka sha li sha zi Oondola dha Namibia dhi li lwopOondola/N$600,000 lwaampoka. Ehangano lyOoselefona lya tseyika nawa lyedhina MTC ndyoka olyo li li Omuyambidhidhi omunene gwOmaulikilo gIikwaipindi ga Ngwediva ngaka olya gandja N$450,000 lwaampoka. Ombaanga yotango yopashigwana First National Bank-FNB) ya gandja N$81,000 yo ndjoka ya Standard Bank tayi gandja N$80,000. Okwa tegelelwa aantu yomayovi ya ka talele po omaulikilo gIikwaipindi ngaka, unene tuu aagundjuka mboka ye ga hole noonkondo.