ESIKU lya tetekele eso lye moshiponga shokambesa lwopOshivelo, omunamimvo 31 Toini Ndapanda Wilhelm okwa li i ikwata ti imbi eimbilo tali ti otandi ke mu longekidhila ehala.
Metseyitho lyahugunina ndyoka a tula kepandja lye lyokoFacebook, Wilhelm okwa shanga ngeyi: “Ngele okwa ti eeno, kapu na ngoka ta ti aawe.”
Wilhelm gumwe gwomaantu 15 mboka ya sile moshiponga shohauto, sho okambesa taka zi koWindhoek ki ingwandjula mololi tayi zi kOmuthiya komatango gEtitano.
Mokambesa omwa li aantu 16 ihe omwa hupu ashike gumwe.
Aantu mulongo nayatatu ayehe oya lungwinina mokambesa, manga yaali yu umbwa mo.
Gumwe gwomumboka yu umbwa mo okwa hupa.
Omunamimvo 33 Andreas Kaupitwa nomuyalekwa gwe, omunamimvo 30 Justine Ndehotela oya pile mokambesa.
Oya li taya yi komukunda ya ka kundathane ondjokana yawo, ndjoka ya li yi na okukala ko muAuguste nuumvo.
Aayalekathani mbaka yaali oya li ya londa mokambesa kalwe ki ili tango ee taya zi mo ya ye muhoka ka kandoma.
Eimbilo lyaWilhelm otali ti: oomwenyo dheni indhi nika uuthigwa. Otandi yi ndi ke mu longekidhile eha, nongele nde mu longekidhile eha, otandi mu ile mu ka kale nkoka ndi li ko.
Yina yaWilhelm, meme Teopo Johannes okwa li a kunkwa noonkondo, onkene ina vula okutya sha, ashike kuume kanakusa, Mwandina Ndayandjaya nahekulu yaNdapanda Wilhelm, Andiri Ya Mbulu oya ti nakusa ka li ha lile okathima koluko. Okwa li omunyanyukwi nomwiitaali.
Yamwe yomaapambele oya ti Ndapanda Wilhelm okwa kala a fa a nongela shoka tashi mu adha konima yomasiku ge gaali gahugunina.
Ndayandjaya okwa ti Wilhelm okwa piti paandjawo manga ina ka londa okambesa opo e mu laleke.“Okwe etele ndje embo ndyoka nde mu pele lwopo9h00.
Okwa li a uluma, ashike inandi mu pula, molwashoka kandali nda hala a tye natu ye pamwe naye.
Oshikando sha hugunina twa kwatathana naye osho a tumine ndje okatumwalaka kutya oku li moTsumeb.
Onda ka uva ashike taku ti okwa sa,” Ndayandjaya ta hokolola noluhodhi.
Okwa li omukadhona omwaanawa, onkene eso lye ekanitho enene kaanegumbo.
Okwa li a tumine ndje okatumwalaka pokati komutenya mEtitano, nokonima yoheyali komatango, aanegumbo oya dhengele ndje taya pula ndje shoka sha ningilwa Ndapanda.
Onda dhengele kuume kandje gwomupolisi.
Okwa lombwele ndje kutya oye ashike a hupu mo moshiponga noku li koshipangelo koTsumeb,” Ya Mbulu ta ti.
Okwa ti opolisi oye ke mu dhengela ishewe tayi ti naye koshipangelo kOshakati meendelelo, molwashoka Ndapanda Wilhelm oko a lundululilwa.
“Ke shi Ndapanda ihe omukiintu gumwe a li nokandjato kopeke noongodhi dhaNdapanda.
Ondu uvu nayi. Onda li ndu udhililila eineekelo, ashike omukumo gwandje ogwa teka sho nda thiki koshipangelo, sho ndi itsu molutu lwe lwa pya,” Ya Mbulu ta ti.
Yaandjawo yaKaupitwa oya ti Kaupitwa naNdehotela oya li ya nyanyukwa noonkondo sho ya yi ongula yEtitano.
Toivo Andreas, omumwayinamati gwaKaupitwa okwa okwa li we metifa lyomalongekidho gohango.
Okwa gwedha po ta ti ina mona nando onale mumwayina a nyanyukwa ngangaaka.
“Iinima yimwe itoyi uvu ko monkalamwenyo. Pegumbo oyi ilwa po kokambesa kalwe ki ili.
Ngeno oya tegelelele ashike, ngeno sigo onena oye li momwenyo. Omolwashike ye na okushendja oombesa? Andreas ta lili.
Mokambesa moka omwa sila wo Aino Nanghonda, omulongi gwoposikola yaElim Combined, ngoka a hokolwa koyaandjawo kutya okwa li omukadhona omwaanawa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
