Omalongekidho gekuto lyaakwiita oge li metifa

UUMINISTILI wEtanga lyEgameno nIipambele yOonakulwa, okutameka moshiwike shotango shaJuli, otaku ka talelapo omahala miitopolwa ya yooloka moshilongo opo wu hogolole mpoka tapu ka tothwa mo mboka taya ka kutilwa metanga lyegameno.

Otaku hokololwa kutya uuministili mboka owa thaneka okukuta aakwiita aape ye li 1 300 mboka taya ka pewa omadheulo omanga inaa ya tameka niilonga.

Mombapila ndjoka ya nuninwa oongolenaya yiitopolwa noyi itsuwika konzonkundaneki ndjika, omukuluntuwiliki muuministili mboka Wilhemine Shivute okwa popi kutya osheendo shawo otashi ka tuminwa kiitopolwa pokati komasiku 5 sigo 28 Juli numvo.

“Elalakano enene okudhimbulukitha oongoloneya notu kale mondjila yimwe yokutotha mo nokutala omahala gokukuta miitopolwa yeni mpoka aaningi yomaindilo taya ka pulwa ya fale omaindilo gawo,” osho Shivute a popi ngaaka.

Omukuluntu gwoshimpungu shiipambele yoshigwana muuministili wetanga lyegameno kolonel Petrus Shilumbu okwa popi kutya omasiku gekuto otaga ka tseyithilwa oshigwana uuna omalongekidho agehe ga pu.

“Aantu naya tegelele owala. Ano omolwashike inaa ya hala okungungumana?” osho a popi ngaaka.

Shilumbu okwa tindi okutya ko sha muule kombinga yekuto ndyoka.

Shilumbu okwa londodha wo oshigwana shi kale shi li uupathi sho kaashi gwile momake gaakengeleli mboka taya longitha edhina lyetanga lyegameno niifundja, taya pula ofuto, kutya oya pewa oshinakugwanithwa shokukuta aantu peha lyuuministili.

Okwa gwedha po wo kutya uuyelele wekuto otawu ka gandjwa moshigwana ngaashi hashi ningwa shito, naamboka otaya ka tothwa mo nokukutwa otashi ka ningwa oshali.

Uuyelele kombinga yekuto lyaakwiita owa tameke okwiingaana omwedhi gwa zi ko nopethimbo ndyoka Shilumbu, okwa popi kutya ekuto lyaakwiita aape olya hwahwamekwa komwaka gwa thigwa po kaaniilonga aakulu mboka ya yi moshipundi dhevululuko, mboka ya hulitha, mboka ya thigi po iilonga osho wo mboka ya lundululilwa palwe muule woomvula dha piti.

“Otu na omwaalu gwaantu oyendji mboka ya yi moshipundi shevululuko, molwashoka okwa li ya waimine etanga lyegameno pethimbo lyemanguluko, oomvula 32 dha piti. Oyendji yomuyo okwa li ye li pomimvo 20 pethimbo ndyoka. Muule woomvula dha piti otwa ndhindhilika aaniilonga ye li po400 mboka ya kala taya yi moshipundi shevululuko omumvo kehe,” osho Shilumbu a popi ngaaka.

Okwa popi kutya uuna ekuto lya tameke, etanga lyegameno otali ka kambadhala okukutha po aantu mboka ye na ohokwe noya halelela okulonga ongaakwiita peha lyaamboka ya hala ashike okukala taya mono iiyemo okupitila miilonga yuukwiita omanga taya tsikile nolukongo lwiilonga palwe.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.