Omakonakono meyako lyekonakono koUnam onkene taga tsikile

“Otatu ka gandja uuyelele kwaashoka sha holoka po uuna omakonakono ga manwa,” osho omupopiliko gwaUnam, Shahid Dickson, a lombwele onzonkundaneki ndjika ngaaka, mEtitatu.

Shoka osha landula ombapila yomapulo nomayamukulo gekonakono ndyoka lya li lyi na okushangwa oshiwike sha zi ko, ya pitithwa mo nokuya momake gaailongi.

Oshiwike sha zi ko, aailongi yomomvula ontitatu moshimpungu shelongo kiitayi ya tumbulwa metetekelo, oya popi kutya yamwe yomaailongi oya kwatwa ye na ombapila yomapulo gekonakono lyoshilongwa shontumba, omanga yamwe okwa li yena ombapila yomayamukulo gekonakono olyo tuu ndyoka, nokwa li ye yi andjaganekathana okupitila koWhatsApp.

Oshiwike sha zi ko, ehanganokalelipo lyaailongi moNamibia lyedhina Student Union of Namibia (SUN) olya popi kutya inali kumwa nande oku uva ekonakono lya yakwa moUnam, nolya popi kutya onkalo yeyako lyekonakono moUnam, oshinima sha kala mo ethimbo nuule.

Omupresitente gwo-SUN, Bernard Kavau, okwa popi kutya oshiputudhilo shoka okwa li shi na okukala hashi longitha omulandu gwomakonakono ga ndulukwa po kolutu lwi ithikamena opo ku yandwe eyako lyekonakono.

Kavau okwa gandja omayele opo omapulo gomakonakono gaUnam ga kale haga totwa nokwe etwa po kiikondo yi ithikamena ngaashi Namibia Qualifications Authority nenge kolaata yelongo lyopombanda moshilongo yedhina National Council for Higher Education nokuwete kutya omulandu ngoka otagu ka keelela ekonakono lyi pitithwe nenge lyi yakwe.

Okwa popi wo kutya Unam okwa pumbwa okwe eta po omulandu gu li nawa ngoka tagu vulu okulongithwa kaailongi opo ya lopote iiningwanima ngaashi okuningilwa uushadha wopaihulo okuza kaalongi opo ya pewe iintsa nenge ya pewa omapulo gekonakono.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.