Omahangano taga pula uukombunda

OMINISTA yeyambulopo lyoondoolopa niitopolwa yokomikunda oya zimine kutya gamwe gomomahangano ngoka gi iyambele mokukokola evi lyomalukalwa miilando oga tula po omilandu opo ga lengwe go ga vule okupewa iilonga kombunda.

Ndhika minista Sophia Shaningwa okwe dhi holola pethimbo ta yamukula omapulo gomukalelipo gwo-DTA megumbo lyomutumba gwopashigwana Elma Dienda.

Opoloholama yokukokola omalukalwa miilando oye etwa po kepangelo lyomupresidente Hage Geingob pamwe nolutu lwokuhwahwameka elunduluko opo ku kokolwe omahala gomalukalwa 200 000 moondoolopa moshilongo ashihe. Minista Shaningwa okwa holola kutya sigo oompaka omahangano 14 oga tseyithila ombelewa ye eyambidhidho lyago koshikonga shokukokola nokwoopaleka omahala gomalukalwa moondoolopa moshilongo ashihe.

Minista okwa yelitha kutya pethimbo lyoonkundathana nuuministeli, osha holoka puuyelele kutya omahangano ogendji itagi iyamba ihe oga tula po omilandu opo ga likole sha moshikonga shoka.

Shaninga okwa holola wo kutya uuministeli otawu ningi omakonaakono opo wu konge mo omahangano ngoka itagi iyamba moshili.

Okwa holola kutya uuministeli we itawu ki idhidhimikila omahangano ngoka ga hala okuningilwa pondhopi kuuministeli moshikonga shekokolo lyomalukalwa moshilongo, ya hala okutya oyi iyamba omanga ondando yomayakulo gawo ga fa ashike gomahangano galwe.

Omahangano ogendji oga holola kutya otagi iyamba mokugandja omayele oshali, ta ti omahangano omashona lela ogo ga gandja uuyelele wo thaathaa kombinga yeiyambo.

Minista okwa ti uuministeli owu na okukonaakona ngele omuyo nomulandu tagu longithwa ogu na tuu ombiliha manga inaku kuthwa etokolo lyahugunina.

Epangelo, okupitila muuministeli, Shaningwa ta ti, owa patulula embo lyokundhindhilika eiyambo kehe. Okwa gwedha po kutya oya pula iikondo ayihe yepangelo ngele oyi na aanawino, iilongitho nenge oopoloholama dhowina kombinga yegandjo lyevi. Elalakano, Shaningwa ta yelitha, okutala ngele omahala gomoondolopa otaga vulu okukolwa taku longithwa oonzo dhepangelo okupitila miikondo yalyo ya yooloka kombiliha opo ku shilipalekwe kutya evi otali gandjwa kombiliha.

Uuministeli owa tota olekenenga yombaanga moka kehe ngoka a hala okukwathela moshikonga shika pashimaliwa ta vulu okutula oshimaliwa.

Uuyelele wi ihwapo kombinga yolekenenga ndjika otawu monika kuamushanga omukuluntu muuministeli weyambulopo lyoondoolopa niitopolwa yokomikunda, Nghidinua Daniel.

Omayalulo agehe gokolekenenga ndjika otaga ka konaakonwa kombelewa yomuyalulindjayi gwomambo gepangelo.

Minista ta ti: “Okupopya okupu, sigo oompaka onda tegelela mboka ya ti otaya yambidhidha ye shi ninge.”

Shaningwa kwa yelitha wo kutya uuministeli otawu ke eta po oonkundathana dhoshikumungu shika, dha kwatela mo uuyelele kombinga yiilonga tayi ka longwa, uulethimbo woproyeka, ondando ayihe koonono yoproyeka nosho wo oshimaliwa tashi ka gandjwa koproyeka ndjika nuumvo.

Opo ihe epangelo tali ka tseyitha omulekeneno gwoproyeka ndjika gwuule womimvo ndatu, ta shi ka ningwa mo2016.

Olopota otayi ka longekidhwa kokangundumutima komproyeka nokukundathanwa kolaata yepangelo manga inayi thikithwa megumbo lyokutota oompango.

Pamulombo gwaminista Shaningwa, uuministeli wiimaliwa moshilongo owi ipyakidhila nokulundulula ontengenekothaneko yiimaliwa yepangelo opo wu kwatele mo oproyeka ndjika.

Minista ta holola kutya otaku thanekwa ku longithwe iimaliwa mbyoka ya li ya thanekelwa kooproyeka dhevi komalelo giitopolwa yi lundululilwe koproyeka ndjika.

Paye, sigo onena epangelo inali longitha nando esenda limwe moproyeka ndjika okuza sho ya tamekele muJuli nuumvo.