Olweendo lwookilometa 700 ashike natango ina mona okatse koshilongo

AAKOKELE yaali oya thigwa yu uvithwanayi noye li monkalo tayi etitha ohenda sho ya kwata olefa okuza komukunda gwawo gu li popepi nondolopa yaRundu okuya kOvenduka opo ya ka konge omikanda dhuukwashigwana.

Kuku Johannes Muhondo (72) nahekulu Bartholomeus Kahinga (111) oyi idhenge ondjila okuza koMile 20 momasiku 27 Novemba, opo ya ka ningithulule okatse koshilongo kakuku Muhonda.

Kuku Muhonda oye awike omusilishimpwiyu gwa kuku Kahinga, nonkalo okwa li ye mu thiminike opo a ye koshilandopangelo nahekulu ngoka ihaa mono ko nawa.

Okwa hokolola kutya onkalo oye ya thiminike ya kale taya lala piitaasi yomahooli, sho ya thiki moshilandopangelo. Okwa popi kutya okwa kala ha penduka ongula esiku kehe nokuya koombelewa dhuuministili wiikwameni, opo a tale ngele ta mono okatse ke, ashike sigo onena, ina moma ekwatho lya sha.

“Onkalamwenyo ondhigu lela koRundu uuna ku una okatse koshilongo. Ihandi kwata openzela nenge ndi mone ekwatho lya sha okuza kepangelo ngaashi aakokele ooyakwetu haya mono.” osho a popi ngaaka.

Okwa popi kutya okwa lombwelwa kutya na tegelele opo omupresitente a tseyithile oshigwana kombinga ya nkene aantu taya ka vula okupewa uutse woshilongo mboka uupe [woludhi opo lwa ndulukwa], opo ashike ta ka vula okukwathelwa.

“Ondu uvite nayi molwashoka otwe ya kOvenduka nelalakano lyokumona okatse koshilongo ando tashi endelelwa po, ashike ngashingeyi otwa kala uule womasiku ogendji tatu mono iihuna kondjala.

“Oshimaliwa shoka she tu thikitha huka, nelalakano lyokuya ndi mone okatse kandje, okwa li owala nde shi hehela kumushiinda nonde mu uvaneke kutya otandi ke shi mu galulila molwashoka otandi ka za ko nokatse kandje ngame ndi tameke okukwata openzela,” osho a popi ngaaka.

Kuku Muhondo okwa popi kutya oha kala u uvithwa nayi kepangelo molwashoka kali na konasha naakwashigwana, unene tuu mboka ye li moluhepo. “Okwa li lela ndi na etegameno kutya onkalo yandje otayi lunduluka” osho kuku Mulondo a popi

ngaaka.

Okukala ndi na okatse koshilongo oshinima shoka tashi eta elunduluko lela monkalamwenyo yandje, osho kuku Mulondo a lombwele oThe Namibian ngaaka, nokwa popi kutya otashi mu kwatha opo a vule okwiikwathela pashimaliwa.

Ku kuku Kahinga, ondjila yokuza koRundu okuya kOvenduka kaya li nande ompu kuye molwashoka oha nyengwa okukuutumba uule wethimbo.

“Otwa sa ondjala notwa kala tuli pondje yoombelewa dhawo ethimbo nuule. Otatu lombwelwa ashike kutya natu tegelele omupresitente a popye kombinga yoshinima shoka shuutse uupe,” osho kuku Kahinga a popi ngaaka.

“Otatu kala tatu lala pondje yoombelewa dhawo nopiitaasi yomahooli sigo uunake?” osho a pula ngaaka.

Kuku Kahinga okwa popi kutya aakokele oya pumbwa okukala taya simanekwa nokupewa omayakulo ge

li nawa moshilongo, ashike olweendo lwawo okuya kOvenduka okuwete lwafa lwonkalo taya ihumbatelwa ya fa aakwiilongo.

Kuku Muhondo okwa popi kutya okwa li a kanitha okatse ke koshilongo opamwe noodokumente dhe

dhilwe, oomvula dha piti po.

Okwa popi kutya sho a yi koombelewa dhiikwameni okwa li a futu ooN$100 okupewa okatse ke

kepangelo ekulu lyaSouth Africa, ashike okatse kepangelo lyaNamibia hoka oko a li a hala ine ka pewa.

Onzonkundaneki ndjika oye shi pondola okukwatathana nomunambelewa omukuluntu gwiipambele

yoshigwana muuministili wIikwameni, Aina Simon, ngoka a popi kutya otashi vulika omukukulupe ngoka

inuuva ko nawa kombinga yelongitho lyuutse uukulu wepangelo lya South Africa, molwashoka sigo

opaife ohawu longithwa.

“Otashi vulika pwa li okwaauvathana nokukala inaa ya lombwelwa nawa kutya uuna wa pewa okatse

okakulu kaSouth West Africa, oko to longitha okuninga eindilo lyokatse kaNamibia,” osho Simon a popi

Okwa popi kutya opo omuntu a pewe okatse koshilongo okape hoka opo ka piti, oye na okuninga eindilo

opo ya pewe okopi yokatse nokuya kombelewa yiikwameni moshitopolwa shawo opo ya pewe okatse

koludhi olupe hoka opo ka piti.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.