Okuyoga iihauto mo Eveline taku tembudhwamo mbala

EWILIKO lyoshilando sha Venduka otali ka lundulula mbala omahala gokuyogela iihauto okuga kutha mepandaanda lyaEveline molukanda lwa Greenwell Matongo moKatutura.

Elundululo ndika olya tegelelwa li ka ningwe muKotoba nuumvo. Omukuluntu gwiilonga yuuInginia melelo lya Venduka miilonga yomeya noondjila, Dirk Reed okwa lombwele oNampa metiyali kutya ondjila ndjoka ya Eveline oya yonagulwa unene koothewa ndhoka dhili momeya ngoka haga yogithwa iiyenditho pomahala gokuyogela iiyenditho geli pooha dhondjila ndjika. Naashika osha etitha opo epandaanda ndyoka li kale lina iilambo oyindji. Reed okwa ti omahala gokuyogela iiyenditho mepandaanda moka ogendji go ishewe kagena uuthemba wokulonga ngaaka.Okwa ti ewiliko lyoshilando olya gandja omahala gaali mpoka tapa kala nokuyogelwa iiyenditho, okuyanda opo epandaanda ndika lyaakale lya yonuka. Okwa ti ehala limwe lyokuyogela iiyenditho otali tungwa mepanda lya Monica omanga etiyali otali tulwa mepandaanda lya Monte Cristo. Okwa ulike kutya omahala ngaka otaga tulwa ominino dhokukuthapo omeya ga luudha noku gafala kokule opo ngoka gaa tondokele mondjila ngaashi tashi ningwa pethimbo ndika moEveline. Okwa ti omahala ngaka oga tegelelwa gapwe okutungwa pehulilo lya Septemba, na otaga ka gandjwa kaayogi yiihauto mboka taya kala nokugafutila komwedhi. Ondando yokuthitha omahala ngaka otayi ka uthwa uuna ngaka ga egululwa. Reed okwa ti iilambo mepandaanda lya Eveline ota yi ka opalekwa nokufilwa ashike uuna omahala agehe goku yogela iihauto ga lundululwamo mehala ndyoka okuya hoka kwatungwa omahala gopaveta.Omumvo gwayi ewiliko lyoshilando olya li lya tokola okwiitulila oodola oomiliona ndatu okutunga omahala gokuyogela iihauto moEveline, moKatutura, pehala lili popepi nomatala gopoSoweto, mOkuryangava, noshowo moWanaheda. Ewiliko olya tile omahala ngaka otaga ka tungwa gaali komumvo kehe sigo agehe gapu.