Okomitiye yaaniilonga mOmbaanga ya Namibia ya gandja omagano kaanasikola

OKOMITIYE yokukwathela oshigwana mOmbaanga ya Namibia ndjoka opo ya totelwe po kaaniilonga yomOmbaanga ndjoka mOshakati moshitopolwa sha Shana meti 3 Juli 2009 oya gandja omagano goombindja dhuutalala kaanasikola yOsikola yaanona ya Katana ye li omilongombali, unene tuu mboka ya talika ko kaye na omakwatho nawa.

Aanona mboka ya pewa omagano ngaka oyo nee Debra Paulus, Shuuya Petrus, Shuama Iiyambo, Theopolina Dianasau Simon Fillipus, Johannes Shindombe, Ishidhimwa Amuteny Cesilia Naukala, Paulina Thomas, Kawaopeni Shonena Christine Pedro, Ronny Dawid, Paulus Paulus Martha Nkoshi, Raini Kanlyanguti, Gerafius Gerafius, Hedwig Dumeni, Claudia Ndelitunga, Hans Timoteus na Veronica Haitembu.Omupopiliko gwOkomitiye ndjika yAaniilonga yomOmbaanga ya Namibia mOshakati ta ti kutya Okomitiye ndjika oya etwa po kAaniilonga yoyene yomOmbaanga ndjika ya Namibia mOshakati, moNooli, nelalakano lyokukwathela oshigwana momikunda moka, unene tuu aanona mboka ya nika oluhepo noya pumbwa okukwathelwa. Tashi ti aaniilonga mOmbanaga ndjika ya tokola okugongela po oshimaliwa nokutota po oshiketha shawo shokukwathela aakwashigwana momikunda moka nosho tuu. Omupopiliko ta ti sho ya konaakona, oya tokola ya ka kwathele uunona wumwe wuunasikola pOsikola yaanona Katana, nopalongelokumwe nOmukuluntu gwOsikola yAanona yaKatana, ano Okatana Primary School tate Robertus Ashiyana, oya landa uumbindja mbuka omilongombali noku ke wu gandja omagano kuunona wuunasikola mpoka omilongombali, uumati nuukadhona. ‘Tse aaniilonga mOmbaanga ya Namibia, pakwathelo lyOondohotola ya SAGO, otwe shi mona mo shoopala okuyakula wo oshigwana pamukalo nguka. Aanona mboka twa pa omagano guumbindja mbuka owa pandula noonkondo oshoka owe ya kwathela ngaanoku ya kutha monkalo yokusa unene uutalala,’ Omupopiliko ta ti ngawo nokugwedha po kutya Omukuluntusikola tate Ashiyana, pehala lyaalongi nOsikola yawo ayehe okwa pandula noonkondo aaniilonga mOmbaanga ya Namibia, sho ye na ko nasha noshigwana ngeyi nokugandja uumbindja omilongombali kaanasikola yawo omilongombali, mboka ngeno ya kala taya si kuutalala, oshoka kaya li taya vulu oku wu landa kwali.