Okanona komimvo ndatu ka dhipagwa kemanya lyokombila

OKANOA kokamati komimvo ndatu komomkunda Omaalala mOshitopolwa sha Shana Matheus Natangwe Thiodor oka mana oondjenda dhako omutenya gwOlyomakaya goshiwike sha zi ko sho ka gwilwa kemanya lyokombila momawenda ga Maalala moka.

Komanda gwOpolisi mOshitopolwa sha Shana Komufala gwOpolisi rauha Amwele okwa koleke oshiningwanima shika. Otaku tiwa kutya okamatyona haka, egumbo lyawo li li ashike mooha dhomawenda ga Maalala, omutenya gwOlyomakaya ngoka, oka adhika pamwe nayakwawo taya dhana poombila momawendo ngoka ga Maalala, sho limwe lyomomamanya koombila hoka lye ka gwile.

Iilyo yofamili ya kamatyona hoka, otayi ti kutya emanya ndyoka lya gwile nokudhipaga okamatyona hoka opo ashike lya adhika lya tulwa ko kombila ndjoka, pwa pita ashike iiwike iyali lwaampoka. Oshilyo shimwe shomofamili ndjika me Anelly Lwaanda, okwa ti oya haluthwa unene kekanitho ndika.

“Eeno, otu shi shi kutya ehalo lya Kalunga, a etha oshiponga shika shi ningwe, ashike otatu shi pele unene uusama ehangano lyokufumvika ndyoka lya tuka kombila ndjika emanya ndjoka. Lya longa nuuhethi, ” Lwaanda ta ti ngawo.

Mumwayinakadhona Selma Lwaanda naye okwa popi sha faathana, ta ti kapu na omalimbililo kutya iilonga ya kundipala ya longwa kehangano ndika lyomafumvoko oyo ya eta eso lya kamatyona gwawo omuholike.

“Eeno, iilonga yawo ya kundipala, oyo ya eta eso lyokamatyona ketu. Omathimbo agehe ngoka sho hatu kala pomafumviko momawendo gi ili nogi ili, omathimbo gamwe ohatu ikwatelele komamanya gokoombila momawendo moka, ashike kaga gwa nande, ” Lwaanda ta ti ngawo nokugwedha ko ta indile omawendo ga Maalala ga kale ga tulwa molugumbo opo kukelelwe iiponga ya fa ngashi shika.

Selma, okwa ti oya ninga oonkundathana nomukuluntu gwehangano lyokufumvika ndyoka lya tula ko emanya ndyoka lya dhipaga okamatyona kawo. Ashike nee ina gandja uuyelele auhe kutya oya popya shike na oshike sha tokolwa po.

The Namibian okwa kundanekwa kutya uunona owa li wa thigwa megumbo na yinakulu na hekulu, manga aakuluntu yawo ya li ya yi kefumviko lyomukwanezimo gumwe momukunda moka.

Oshi li ngeyi kutya halo lwotango uunona mbuka tau dhana momawendo moka, ihe nee mOlyomakaya ngoka wa mono oshiponga, osha fa shi li ngeyi kutya kamwe nange yamwe yomuunona owa undula emanya lyombila ndyoka, ndyoka lya gwile nee kombanda ya Thiodor, tali mu teya omagulu nesipa lyomutse.

Thiodor ina sa kwali epthimbo ndyoka, ashike nee mupya omunene uunona uukwawo inawu ka lopota oshiponga shika nziya kuyinakulu nahekulu.

Tashi vulika wa li wa tila ngiina nenge wa piyaganekwa koshiningwanima shika.

“Kapu na naanaa ngoka ta vulu oku shi yeleka kutya Thiodor kohi ye manya hoka, okwa kala ko uule wethimbo li thike peni. Ngaye kehala hoka onda yi ko ashike konima sho nda uvu uunona tau lili, ” Gumwe gwomaakwashigwana ngoka a yi ko tango kehala lyopshiponga shoka, a ti ngawo.

Ashike nee ina hala okwwiipopya kutya oye lye. Ta ti sho e ya pehala lyoshiponga mpoka, okwa kutha ko emanya kombanda ya Thiodor, a yambidhidhwa kuyamwe yomaaniilonga mboka ya adhika taya tungu posikola yi li popepi nomawendo ngoka.

Sho ya kutha Thiodor kohi yemanya ngawo, oye mu fala koshipangelo shEpangelo sha Shakati ashike, omolu ombinzi oyindji ndjoka a li a kanitha ngiika, okwa hulitha manga ashike ngeno ta mono eyakulo lyopaunamiti.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.