Nghipondoka a yemba etidhomosikola

OMUPEVIMINISTA gwelongo, meme Anna Nghipondoka, okwa kunkulile aakuluntusikola opo yaa tidhe aalongwa mboka taya kayula onyanga, teya pula ya landule omilandu dha tulwa po.

Omupevi minista okwa holola nkene sha pumbiwa opo aanongeki ya tseye oonkalo moka aalongwa haya zi opo ya vule oku ya kwathela noku ungaunga nayo shi ikwatelela konkalo, ta ti shika otashi kwashilipaleke kutya aanona ayehe oya patululilwa omiyelo dhelongo lyongushu.

Ndhika okwe dhi lombwele aakuluntusikola koshiithanene shelongo shokoshitopolwa sha//Karas koKarasburg mEtine lya zi ko.

Omutumba ogwa yungwa kohi yoshipalanyolo “Elongo lyongushu oshinakugwanithwa shaayehe”.

“Taleni muule wonkalonawa yawo manga ina mu tidha nando omulongwa gumwe”, Nghipondoka ta ti.

Okwa ti pampango, aanongeki oya tegelelwa ya kaleke aanona moosikola ihe haku ya tidhila momapandaanda, ta ti kehe gumwe a tidhwa nenge i itekwa ota ka kala omukundu komongula.

“Otaya ka ninga aafuthi, notaya ka teya tango omagumbo gaakuluntusikola mboka ye ya tidha moosikola, ya kwata onkone”, Nghipondoka ta gwedha po.

Okwi indile aakuthimbinga melongo ayehe yi itule mo melongo lyaanona Aanamibia, ta ti kehe omukwashigwana “ota vulu okutunga nenge okuhanagula po oshigwana shika, tashi pitile mekuthombinga lye melongo nomomukalo ngoka e li tala ko”.

Okwa londodha aaniilonga ayehe muuministeli kutya oshikondo she itashi ka pitika we ondjigilile yondende miilonga.

Nghipondoka okwa ti elalakano olyo okulundulula omikalo niilonga yawo opo ya kwashilipaleke kutya oya adha eteyo kamana, ta ti otaku nyenyetwa kutya iizemo yelongo ihayi tsu kumwe naashoka hashi pombelwa moshikondo shika, nokwa pandula oshitopolwa sha//Karas sho shu unganeke oshiithanene shika opo shi talulule iilonga yasho.